Քաղաքագետ Աղասի Ենոքյանի համոզմամբ՝ սեպտեմբերին նախատեսվելիք ՀՀ եւ Ադրբեջանի արտգործնախարարների հանդիպման համատեքստում բանակցությունների վերսկսման նախադրյալներ չկան: «Չկան էական փոփոխություններ, որոնք կարող էին ենթադրել բանակցային գործընթացի վերսկսում»,-Aravot.am-ի հետ զրույցում ասում է նա: Ենոքյանի կարծիքով՝ Ադրբեջանում խորացող քաղաքական եւ տնտեսական ճգնաժամը սահմանային միջադեպերի վրա էական ազդեցություն չի ունենա. «Այն դեռ չի հասել զգալի մակարդակի: Նույն կերպ, Հայաստանում էլ այդ ճգնաժամն էական մակարդակի չի հասել»:
Հետաքրքրվեցինք՝ ռուս-ամերիկյան սրվող հարաբերություններն ինչպե՞ս կանդրադառնան ԵԱՀԿ Մինսկի խմբի աշխատանքի վրա: «Մինսկի խումբը կարծես թե կարողանում է այդ ամենը համադրել իր մեջ եւ դեռեւս կարողանում է կատարել միջնորդի իր գործառույթը՝ գոնե բանակցությունները կենդանի պահելու առումով, ինչը շատ կարեւոր է: Վախենամ, որ այդ հարաբերությունների սրացումը կբերի Մինսկի խմբի գործառույթի չկատարմանը: Համենայն դեպս, Մինսկի խումբը չկարողացավ Ադրբեջանին պարտադրել կատարել Վիեննայի եւ Սանկտ-Պետերբուրգի պայմանավորվածությունները: Ադրբեջանի մոտեցումը հետեւյալն է. եթե նա գնում է որեւէ քայլի, ուրեմն համաձայն է եղած «ստատուս քվո»-ն պահպանելուն: Եթե չի գնում, ուրեմն համաձայն չէ: Այդ պայմանավորվածություններից խուսափելը պատերազմի մշտական վտանգ է պարունակում»,-պատասխանեց Աղասի Ենոքյանը:
Լուիզա ՍՈՒՔԻԱՍՅԱՆ
