Օգոստոսի 24-ին Ոստիկանության ՊՊԾ գունդը գրաված «Սասնա ծռեր» զինված խմբին աջակցելու մեջ մեղադրվող Կարո Եղնուկյանի փաստաբան Տիգրան Հայրապետյանը բողոք էր ներկայացրել Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարան, որպեսզի վերջինս ճանաչի այն փաստը, որ Կարո Եղնուկյանի գործով նախաքննության ընթացքում կոպիտ խախտումներ են եղել եւ որոշում կայացնի՝ Եղնուկյանի իրավունքների խախտումները վերացնելու առնչությամբ: Տիգրան Հայրապետյանն Aravot-ի հետ զրույցում ասաց, որ դատարանի որոշումը դեռ չի ստացել, սակայն ենթադրելի է, որ բողոքը մերժվելու է:
«Նախաքննության ընթացքում ակնհայտ կոպիտ խախտումներ են եղել, ինչի դեմ բողոք էինք ներկայացրել: Եղնուկյանն ասում է, որ արդեն որեւէ բան ձեռնարկելն անիմաստ է: Ինձ անգամ թույլ չտվեցին ավարտել բողոքը ներկայացնելը, դատավորն ակնհայտ վերաբերմունք էր ցույց տալիս, որ մերժելու է այն»,-ասաց փաստաբանը:
Նա նշեց, որ նախաքննության ընթացքում պաշտպանական կողմին գործի նյութերի մի մասն են միայն տրամադրել. «Չկան այն նյութերը, որոնք արդարացնում են Եղնուկյանին: Այդպես չի կարող լինել: Քննիչը օպերատիվ հարցումներ է կատարել, ստացել է պատասխանները, որոնք սակայն չկան քրեական գործի նյութերում: Հեռախոսների գաղտնալսման արձանագրություններն ենք ցանկացել ստանալ, որոնք եւս չեն տրամադրվել: Խախտումներն այսքանով չեն սահմանափակվում»:
Հայրապետյանի խոսքով՝ սպառելու են բոլոր դատական ատյանները, որպեսզի դիմեն ՄԻԵԴ՝ Եղնուկյանի գործով նախաքննության ընթացքում խախտումների փաստով:
Լուիզա ՍՈՒՔԻԱՍՅԱՆ
