«Սա քաղաքական հետապնդում է Անդրիասի հանդեպ: Զանգվածային անկարգություն պետք է եղած լինի, որ մի հատ էլ նման մեղադրանք ներկայացնեն իրեն»,-նախորդ տարվա հուլիսյան դեպքերի ժամանակ զանգվածային անկարգություններ իրականացնելու եւ ՊՊԾ գունդը գրավածներին միանալու փորձ կատարելու մեջ մեղադրվող Անդրիաս Ղուկասյանի գործով դատական նիստի ավարտին այսօր Aravot.am-ի եւ News.am-ի հետ զրույցում ասաց գործով վկա, «Ժառանգություն» կուսակցության փոխնախագահ Արմեն Մարտիրոսյանը: Նա մեկ այլ գործով էլ մեղադրյալ է. մեղադրանքը նույնն է, ինչ Ղուկասյանին առաջադրվածը:
Մարտիրոսյանը տեղեկացրեց, որ գործը դեռ նախաքննության փուլում է, եւ նույն մեղադրանքն է առաջադրվել նաեւ Դավիթ Սանասարյանին, Հովսեփ Խուրշուդյանին. «Անգամ վկաներ չկան, ո՞վ պետք է լինի…գուցե կեղծ վկաներ գտնեն-բերեն, ինչպես Անդրիասի դեպքում, բայց ակնհայտ էր, որ մեր՝ քաղաքական գործիչներիս գործողությունները բացառապես քաղաքական են եղել: Բոլորն էլ ուղիղ եթերով տեսել են, թե ինչ է տեղի ունեցել հուլիսի 29-ին : Ոստիկանության կողմից ապօրինի ուժային գործողություն է եղել քաղաքացիների հանդեպ, մեծածավալ բռնություն է եղել: Ուղիղ եթերից պարզ էր, որ ոչ մի զանգվածային անկարգություն էլ չկա»:
Արմեն Մարտիրոսյանը վստահեցրեց, որ իրենք, այդ թվում՝ Անդրիաս Ղուկասյանը, ՊՊԾ գունդը գրավածներին միանալու կոչեր չեն հնչեցրել, հակառակը՝ քաղաքացիներին զգուշացրել են, որ իրենց մեջ «իշխանության սադրիչներ» կան:
Լուիզա ՍՈՒՔԻԱՍՅԱՆ
