Դատավոր Տաթեւիկ Գրիգորյանի նախագահությամբ այսօր «Ժիրայր Սեֆիլյանի եւ մյուսների գործով» հերթական դատական նիստն է: «Հիմնադիր խորհրդարան» ընդդիմադիր շարժման առաջնորդ, Շուշիի առանձնակի գումարտակի հրամանատար Ժիրայր Սեֆիլյանը մեղադրվում է ապօրինի զենք-զինամթերք պահելու, հանցավոր նպատակներով խումբ (ամբաստանյալներ՝ Ներսես Պողոսյան, Սասունիկ Կիրակոսյան, Գալուստ Գրիգորյան, Հովհաննես Պետրոսյան, Գեւորգ Սաֆարյան, Հրայր Թոփչյան) ձեւավորելու, շենք-շինություններ, մասնավորապես՝ զորամաս եւ Երեւանի հեռուստաաշտարակը զավթելու փորձի մեջ:
Ամբաստանյալներից Ներսես Պողոսյանի շահերի պաշտպան, փաստաբան Արայիկ Պապիկյանը ներկայացրեց գործով մեղադրող-դատախազ Պետրոս Պետրոսյանի դեմ ինքնաբացարկի միջնորդություն՝ նշելով, որ այս գործից անջատված մասով մեղադրյալ Արթուր Մովսիսյանի մեղադրանքն ընթերցելիս օրերս նա բնորոշումներ է ընթերցել՝ Սեֆիլյանի գործով ամբաստանյալներին որակելով որպես արդեն իսկ հանցավոր խումբ կազմած անձանց (դատավճիռ դեռ չկա):
«Պետրոս Պետրոսյանն ընդգծված դիրքորոշում ունի Սեֆիլյանի, Ներսես Պողոսյանի, Գեւորգ Սաֆարյանի, Հրայր Թոփչյանի հանդեպ…Նա չի կարող օբյեկտիվ եւ անկողմնակալ լինել այդ անձանց եւ գործում առկա հանգամանքների հանդեպ»,-համոզմունք հայտնեց Արայիկ Պապիկյանը, ապա հավելեց՝ այստեղից հետեւում է, որ Սեֆիլյանի եւ մյուսների ճակատագրերը կանխորոշված են, հետագա դատավարական գործողություններն էլ՝ ձեւական:
Դատախազ Պետրոս Պետրոսյանը միջնորդության դեմ առարկեց՝ նշելով, որ կանխակալ վերաբերմունքի դրսեւորման փաստ եւ հանգամանքներ չկան:
Վերադառնալով խորհրդակցական սենյակից՝ դատավորը որոշեց միջնորդությունը մերժել, իսկ դա նշանակում է, որ Պետրոսյանը շարունակելու է հանդես գալ որպես այս գործով մեղադրող-դատախազ:
Դատաքննությունն իրեղեն ապացույցների զննության փուլում է:
Լուիզա ՍՈՒՔԻԱՍՅԱՆ
