2017 թվականին Գերմանիայի Յուստ կղզում տեղի ունեցած Transcultural art lab 2017 ծրագրի ընթացքում արված աշխատանքները տարբեր երկրների արվեստագետների համատեղ ուժերով են արվել: Ցուցահանդեսի կազմակերպիչներից Անդրեա Մարտենսը (Andrea Martens) մեզ հետ զրույցում դժվարացավ նշել հայ և արտասահմանցի արվեստագետների աշխատանքային ոճերի տարբերությունը:
Ասում է՝ տարբերությունները անհատականորեն են երևում: «Արդեն երկրորդ տարին ենք նման համագործակցային միջոցառում իրականցնում և մեզ շատ են դուր գալիս միջմշակութային հաղորդակցությունները: Հետաքրքիր է տեղեկանալ այս ազգի մշակույթի մասին»:
Կազմակերպիչը նշում է, որ ծրագրի կոնցեպտը շատ ավելի լայն է և այն հնարավորություն է տալիս տարբեր մոտեցումներ և տարբեր ոճեր տեսնել: Նա կարծում է՝ վերջում կունենանք մի պատկեր՝ ինչպես են տարբեր մարդիկ տարբեր մշակույթներից արվեստի միջոցով պատկերում մեր ապագան:
Կազմակերպիչներից Ֆեննի Ռիբերը (Fanny Rieber ) պատմում է, որ Հայաստանում նման բան կազմակերպելու հիմքը եղել է մեր ազգի առանձնահատկություններն ու մշակույթը ճանաչելու ցանկությունը:
Ինչ վերաբերվում է տարբեր մշակույթների անձանց միասին աշխատելուն՝ նշում է ՝ տարբեր անհատները տարբեր մոտեցումներ ունեն միևնույն երևույթին. «Շատ դժվար է տարբերություններ նշել արտիստների աշխատանքների միջև, դա էլ կարծում եմ հենց ամենահետաքրքիրն է, երբ մի քանի տարբեր արվեստագետներ հավաքվում են որպես անհատականություններ, բացահայտվում են նրանց ինդիվիդուալ առանձնահատկությունները, ոչ թե ազգային»:
Նա հույս է հայտնում, որ նման նախագծերը շարունակական կլինեն: Ասում է ՝ արդեն նոր ծրագրի համար հայտ ներկայացրել են, սպասում են արձագանքներին:
Կարինե ԿԻՐԱԿՈՍՅԱՆ
