Փոխզիջումների մասին խոսք կարող լինել այն պարագայում, երբ մենք Ադրբեջանից ստանանք հստակ ուղերձ, որ Բաքուն պատրաստ է ճանաչել Արցախի ժողովրդի ինքնորոշման իրավունքը:
Այս մասին այսօր Ստեփանակերտում հրավիրած մամուլի ասուլիսում հայտնել է ՀՀ վարչապետ Նիկոլ Փաշինյանը:
Նա նկատեց, որ բանակցությունները չեն խանգարում լրջագույն ջանքեր գործադրվելու և դրանք բազմապատկելու` Արցախի միջազգային ճանաչման ուղղությամբ: Միջազգային հանրությունը պետք է շատ հստակ արձանագրի, որ Արցախի հարցի էությունը մարդու իրավունքների պաշտպանության խնդիրն է:
«Այս հակամարտությունը տարածքային հակամարտություն չէ: Այս հակամարտությունը ծագել է այն բանի արդյունքում, երբ Արցախի հայությունը որոշել է պաշտպանել իր ամենատարրական իրավունքները, քանի որ Ադրբեջանը այն տարիներին ոչ միայն ի վիճակի չի եղել ապահովել ԼՂԻՄ-ի հայ բնակչության իրավունքները, այլև ուղիղ սպառնալիք է ստեղծել նրանց կյանքի և ինքնության իրավունքի վրա: Այդ սպառնալիքները ոչ թե բանավոր խոսքերով են արտահայտվել, այլ արտահայտվել են կոնկրետ գործողություններով` խաղաղ բնակչության դեմ ռազմական գործողություներ կիրառելով»,- նշեց վարչապետը:
Անդրադառնալով հայաստանյան հեղափոխական շարժմանը` Նիկոլ Փաշինյանը ընդգծեց, որ շարժումը չի ունեցել և չունի որևէ աշխարհաքաղաքական ենթատեքստ, չի եղել աշխարհաքաղաքական որևէ օրակարգ, առավել ևս դավադրություն: Ըստ նրա առնվազն հենց այս փաստը բացառում է հայաստանյան հեղափոխության համեմատությունը` այլ երկրներում տեղի ունեցած գործընթացների հետ:
«Սերժ Սարգսյանը, ով ժողովրդական ճնշման ներքո հրաժարական տվեց, մինչ այսօր գտնվում է Հայաստանի Հանրապետությունում: Սա ևս բացառիկ է. ես ուրախ եմ այս կապակցությամբ և սա ասում եմ, որպես մեր շարժման առավելություն, որովհետև մեր խնդիրը ոչ թե Հայաստանում նոր թշնամության գծեր քաշելն է, այլ եղած թշնամության գծերը վերացնելը և համերաշխության մթնոլորտ ստեղծելը»,- ասաց Ն. Փաշինյանը:
Խոսելով կառավարության ձևավորման մասին Նիկոլ Փաշինյանը ասաց, որ «Քաղաքացիական պայմանագիր» կուսակցությունն ունի և ունեցել է կառավարության իր տարբերակը, բայց քանի որ ձևակերպվել է այլ խնդիր, քան իշխանությունը վերցնելը, այդ իսկ պատճառով խորհրդարանական բոլորի ուժերի հետ կլինեն խորհրդակցություններ և դրա հիման վրա կձևավորվի կառավարություն:
Դավիթ ԱԲԱՂՅԱՆ
Նոյն միտքը առաւօտեան էլ լսեցի ու զարմացայ: Չեմ հասկանում, բայց ինչո՞ւ պիտի Սերժ Սարգսեանը լքէր Հայաստանը:
Երեւի Դուք ծանօթ չէք «իսկական յեղափոխականների» տեսակէտներին: Որոնք նաեւ խորապէս համոզուած են որ առանց իրենց անցած գործունէութեան ու վաստակին, ներկայ Վարչապետին համար անհնար կը լինէր հասնիլ այնտեղ, ուր որ ցարդ հասաւ: Ասոնք իրեն համար աւելի մեծ գլխու ցաւ են, քան թէ ինկած վարչակարգի մնացորդը: