Ինչ խոսք, կարեւոր է, որ «Լիդիան Արմենիան» պատրաստ է իրենց ծրագրի ամեն մի ստուգման, ինչի մասին նշել են հայտարարության մեջ։ Քանի որ հիմա ամեն ինչ ԱԱԾ-ն է ստուգում, կարելի է առաջարկել, որ մի հատ էլ այս ներդրումային ծրագիրը համալիր ստուգեն, վճիռը կայացնեն՝ հա կամ չէ, ու մարդիկ սկսեն աշխատել կամ, հակառակը, իրենց եղած-չեղածը հավաքեն ու թողնեն-գնան՝ հնարավոր ներդրումներով հանդերձ։
Էլ ավելի պարզ ասած՝ եթե օրինական չէ նրանց գործունեությունը, նախատեսված կարգով կասեցրեք։ Իսկ եթե օրինական է, ապա հետեւեք, որ չխանգարեն աշխատել, ու աշխատեն այնպես, ինչպես պարտավորվել են։ Վերջ։
Ի դեպ, երեկ ներդրումների մասին խոսակցություն է եղել նաեւ վարչապետ Նիկոլ Փաշինյանի եւ Հայաստանում Եվրամիության պատվիրակության ղեկավար Պյոտր Սվիտալսկու հանդիպման ժամանակ։ Ըստ տարածված պաշտոնական հաղորդագրության, դեսպան Սվիտալսկին նշել է, որ տեսնում է դեպի Հայաստան եվրոպական ներդրումներ ներգրավելու լավ հնարավորություններ, հատկապես պետություն- մասնավոր հատված համագործակցության շրջանակում տարբեր ծրագրեր իրականացնելու ուղղությամբ։ Պյոտր Սվիտալսկու խոսքով՝ եվրոպացի ներդրողները պատրաստ են քննարկել կոնկրետ ծրագրեր։
Անխուսափելիորեն հարց է ծագում. իսկ գուցե «Լիդիան Արմենիան» ասիակա՞ն կամ աֆրիկյա՞ն ներդրում է, այլ ոչ թե, ասենք, ամերիկյան, մասամբ նաեւ՝ եվրոպական։ Թեպետ դա այնքան էլ ճիշտ հարցադրում չէ։ Եվ հետո, աշխատաոճին որ նայում ես, չէ՝ լավ էլ արեւմտաեվրոպական ներդրում է։
Երկրորդ հարցը՝ ինչպե՞ս է «եվրոպական ներդրումներ ներգրավելու լավ հնարավորություններ» տեսնում դեսպան Սվիտալսկին, եթե կարելի է, օրինակ, մի 20 հոգով երկու օր կաթվածահար անել օտարերկրյա կապիտալի ներգրավմամբ գործող որեւէ ընկերության աշխատանքը՝ իշխանության մարմինների բացարձակ իներտության պայմաններում։
Արմեն ՀԱԿՈԲՅԱՆ
Հոդվածն ամբողջությամբ կարող եք կարդալ «Հայոց աշխարհ» թերթի այսօրվա համարում
