Ինձ համար մեծ պատիվ կլիներ, որ պետնախարարի պաշտոնում ինձ փոխարիներ Ազգային անվտանգության ծառայության պետ Արշավիր Ղարամյանը: Այս մասին այսօր տեղի ունեցած մամուլի ասուլիսի ժամանակ ասաց Արցախի արդեն նախկին պետնախարար Արայիկ Հարությունյանը:
«Արշավիր Ղարամյանը ինձ հանդիպած եզակի մարդկանցից մեկն է, ով հատուկ հարգանքի է արժանի, գնահատում եմ նրա գիտելիքները և անցած ճանապարհը: Ընդհանուր առմամբ Արշավիր Ղարամյանը և Կամո Աղաջանյանը լեգենդար մարդիկ են, երկուսն էլ ունեն անցած ճանապարհ, և նրանց կենսագրությունը կարող է սերունդներ դաստիարակել»,- ասաց նա:
Արայիկ Հարությունյանը վստահեցրեց, որ իր հրաժարականի համար ոչ մի ազդեցություն չի եղել որևէ մեկի կողմից, և այդպիսի որակումները միայն ծիծաղ են առաջացնում:
Նա նաև նշեց, որ օրակարգում նախատեսված էր ՀՀ առաջին փոխվարչապետ Արարատ Միրզոյանի հետ այցելություն արտերկիր` հանդիպելու գործարար աշխարհի ներկայացուցիչների հետ: Այս պահին հստակ չէ, այցը կկայանա, թե ոչ:
Դավիթ ԱԲԱՂՅԱՆ
