Պետական եկամուտների կոմիտեն, այս տարվա հունվար-օգոստոս ամիսների ստուգումների արդյունքում, տնտեսավարողներին առաջադրել է պետական բյուջե վճարելու լրացուցիչ 13.5 միլիարդ դրամ պարտավորություն։ Այս մասին լրագրողների հանդիպմանն ասաց ՊԵԿ նախագահ Դավիթ Անանյանը:
Նրա ներկայացմամբ, նույն ժամանակահատվածում ՊԵԿ-ը հավաքագրել է 880 միլիարդ դրամ հարկային եկամուտ, որից 670.7 միլիարդ դրամը՝ հարկային մարմինների կողմից, իսկ 209.4 միլիարդը՝ մաքսային մարմինների։
Անանյանն ասաց, որ նախորդ տարվա նույն ժամանակաշրջանի համեմատությամբ՝ պետական բյուջեի եկամուտների աճը կազմել է 120.8 միլիարդ դրամ, այսինքն` աճել է 15.9%-ով:
«2018-ին հունվար-օգոստոս ամիսներին «մաքուր» հավաքագրված գումարը կազմել է 812.8 միլիարդ դրամ, որը 78.0 դրամով կամ 10.6%-ով ավելի է նախորդ տարվա նույն ժամանակահատվածի ցուցանիշից», – ասաց Անանյանը:
ՊԵԿ նախագահն ասաց, որ 2017-ի տարվա նույն ժամանակահատվածի համեմատությամբ համալիր հարկային ստուգումների քանակը նվազել է շուրջ 16 տոկոսով: Չնայած դրան ստուգումների արդյունքում կազմված ակտերով արձանագրված գումարը 2017-ի նույն ժամանակահատվածի համեմատ աճել է 12.8%-ով:
Նելլի ԲԱԲԱՅԱՆ