Ոստիկանության Իջեւանի բաժին է դիմել Մակարավանքի քահանա Տեր Արշավիրը եւ հայտնել, որ դեկտեմբերի 14-ից 15-ն ընկած ժամանակահատվածում անհայտ անձը կամ անձինք համալիրի դռան փականը կոտրել են, մտել ներս եւ այնտեղից գողացել արծաթե մոմակալներ, իսկ հետո կոտրել հանգանակության գանձանակը եւ հափշտակել այնտեղ եղած գումարը: Ոստիկանության Իջևանի բաժնի հետաքննչական բաժանմունքում նշանակվել են մի շարք փորձաքննություններ՝ պարզելու համար վանական համալիրի կրած վնասի չափը:
Իրավապահներից տեղեկացանք, որ գողացել են 2 մոմակալ եւ գանձանակը, որի մեջ գումարը չէր կարող մեծ լինել: Մակարավանքի քահանա Տեր Արշավիրը ամեն օր ժամը 16.30-ին ավարտում է իր աշխատանքը, որից հետո գողերը կարող են թալանել հոգեւոր օջախը:
Սա Մակարավանքից թվով 3-րդ գողությունն է, հայտնել ենք, որ նախորդ գողությունը կատարվել է 2018թ. հունվարի լույս 14-ի գիշերը:
Ոսկան ՍԱՐԳՍՅԱՆ
