Տավուշի մարզի առաջին ատյանի դատարանում ընթանում է Արթուր Մինասյանի եւ Սարգիս Տարախչյանի դատավարությունը: ՀՀ ՊՆ զորամասերից մեկի հրամանատարի հրետանու գծով տեղակալ, գնդապետ Արթուր Մինասյանին մեղադրանք է առաջադրվել այն բանի համար, որ նա 2018թ. մայիսի 21-ի ժամը 22-ի սահմաններում զինվորական ծառայության հետ չկապված ծեծի է ենթարկել ՊՆ այլ զորամասի իրային ծառայության պետ , մայոր Լեռնիկ Օհանյանին՝ պատճառելով նրա առողջությանը թեթեւ վնաս, առողջության կարճատեւ քայքայումով:
Լ. Օհանյանի հետ նույն զորամասում ծառայող Սարգիս Տարախչյանին մեղադրանք է առաջադրվել այն բանի համար, որ վերը նշված ժամանակ, իրենց զորամասի հանգստի սենյակում ականատես լինելով Արթուր Մինասյանի կողմից Լ. Օհանյանի նկատմամբ բռնություն գործադրելու դեպքին, ՀՀ ԶՈՒ ներքին ծառայության կանոնագրքի 13-րդ եւ 16-րդ հոդվածների պահանջների համաձայն պարտավոր լինելով զինծառայողների կողմից կամ նրանց մասնակցությամբ տեղի ունեցած հանցագործությունների, իրավախախտումների, պատահարների մասին հայտնել իրավապահ մարմիններին, հանցագործության դեպքի մասին սահմանված կարգի համաձայն իրավապահ մարմիններին չի հայտնել, թաքցրել է այն:
Ա. Մինասյանին մեղադրանք է առաջադրվել ՀՀ քրեական օրենսգրքի 358.1 հոդվածի 3-րդ մասի 4-րդ կետով, Ս. Տարախչյանին՝ 375 հոդվածի 1-ին մասով:
Սույն քրեական գործով մեղադրանքը պաշտպանում է Լոռու կայազորի զինվորական դատախազությունը:
Ոսկան ՍԱՐԳՍՅԱՆ
