Մարտի 27-ին Մասիսի երիտասարդական կենտրոնի նախաձեռնությամբ տեղի ունեցավ հանդիպում-քննարկում գրականագետ Արքմենիկ Նիկողոսյանի հետ, քննարկվեց Անրի Վեռնոյի «Մայրիկը» գիրքը: Հանդիպմանը ներկա էին ՀՀ մշակույթի նախարարության հրատարակչական գործի բաժնի պետ Արմեն Ավանեսյանը, կամավորներ դպրոցականներ, ուսանողներ և, առհասարակ, գրքասերներ:
Հանդիպման սկզբում հյուրերը ծանոթացան Մասիսի զարգացման հիմնադրամի և Մասիսի երիտասարդական կենտրոնի գործունեությանն ու ծրագրերին, որից հետո գրքի քննարկումը սկսվեց ֆիլմի հետ համեմատությամբ:
Արքմենիկ Նիկողոսյանի օգնությամբ մասնակիցներն անդրադարձան գրքի հիմնական գաղափարներին, վերլուծեցին գրքից տարբեր հատվածներ, կատարեցին կերպարների համադրումներ և համեմատումներ, վերհանեցին գրքի արդիականությունը:
«Ես, անկեղծ ասած, չեմ հասկացել ֆիլմը և դիմել եմ գրքին: Դեռ մանկուց վստահ եմ եղել, որ գիրքը շատ ավելին է, քան ֆիլմը, բայց «Մայրիկ»-ի դեպքում մի փոքր այլ բան կատարվեց: Ես նախընտրում եմ ֆիլմը, որովհետև գիրքը գրվել է ֆիլմի հիման վրա»,-ասաց Արքմենիկ Նիկողոսյանը:
Կարդացեք նաև
Անրի Վեռնոյից մինչև Ակսել Բակունց, Հովհաննես Թումանյան, ընդհուպ մինչև ժամանակակից գրողներ: Մասիսցի երիտասարդների համար գրքի քննարկումն անցկացվեց նոր մոտեցմամբ: Բանախոսի օգնությամբ երիտասարդները սովորեցին` ինչպես աշխատել գրական ստեղծագործության հետ, ինչպես վերլուծություններ կատարել և գիրքն ընթերցելիս ինչին հատկապես ուշադրություն դարձնել:
Արքմենիկ Նիկողոսյանն ու Արմեն Ավանեսյանը խոստացան նոր գրքեր նվիրել Մասիսի երիտասարդական կենտրոնի գրադարանին և աջակցել երիտասարդների շրջանում ընթերցանության տարածմանը: Ինչպես նաև կիսվեցին իրենց խորհուրդներով ու կարծիքներով, ուղղորդեցին` ինչպես քաղաքում զարգացնել ընթերցանությունը:
Բացի դասական գրականությունից, Արքմենիկ Նիկողոսյանն ու Արմեն Ավանեսյանը անդրադարձան նաև ժամանակակից գրականությանը: Նշեցին` որոնք են ժամանակակից գրականության դրական կողմերն ու առաջարկեցին մի քանի գրքեր, որոնք կարելի է կարդալ` ժամանակակից գրականությանը ծանոթ լինելու համար: Գրականագետ Արքմենիկ Նիկողոսյանը խորհուրդ տվեց ընթերցել Հրանտ Մաթևոսյանի «Մեծամոր» էսսեն և հաջորդ անգամ հանդիպել այդ ստեղծագործության քննարկման առիթով:
Ալվարդ Հարությունյան
