Այսօր Վերաքննիչ քրեական դատարանում երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորումը եւս երկու ամսով երկարացնելու վերաբերյալ առաջին ատյանի որոշման դեմ պաշտպանական խմբի կողմից ներկայացված բողոքի քննությունն է: Ռոբերտ Քոչարյանը մասնակցում է նիստին:
Նիստն այսօր ընդմիջվեց եւ կշարունակվի վաղը ժամը 12-ին: Պաշտպան Հայկ Ալումյանն ասաց, որ դատախազության հիմնավորումների հետ կապված իրենց հիմնավորումները կներկայացնեն վաղը: Ներկայացվել է պաշտպանական կողմի բողոքի 40 տոկոսը:
Ալումյանն ասաց, որ վաղը կշարունակի բողոքը ներկայացնելը, որից հետո կներկայացնեն առարկությունները դատախազության բողոքի վերաբերյալ, դրանից հետո դատախազությունը կներկայացնի իր առարկությունները պաշտպանական կողմի բողոքի վերաբերյալ, իսկ հետո, եթե Քոչարյանը ասելիք ունենա, կասի իր ասելիքը:
Aravot.am-ը խնդրել էր պարոն Ալումյանին Քոչարյանից պարզել, թե կալանավայրում ի՞նչ գրքեր է կարդում Քոչարյանը:
Կարդացեք նաև
Մենք հիշեցրինք, որ մամուլում հրապարակումներ կան, որ ժամանակին Ռոբերտ Քոչարյանը համալսարանում ուսանողների հետ հանդիպման ասել էր, որ ինքը չի սիրում գիրք կարդալ, բայց հիմա կալանավայրում փաստորեն կարդո՞ւմ է ու ի՞նչ գրքեր է կարդում՝ Ալումյանը պատասխանեց. «Նախ, ես չգիտեմ, որ ինքը այդպիսի բան ասած լինի, որ գիրք կարդալ չի սիրում: Ձեր նախաբանի հետ չեմ կարող ոչ համաձայնել, ոչ էլ ոչ, չգիտեմ որ աղբյուրից եք դուք օգտվել, չեմ տեսել: Բայց ձեր խնդրանքով ես իրենից ճշտեցի, ինքը ավարտել է Ֆրենսիս Ֆուկույամայի Identity գիրքը եւ Siemens-ի Լeadership-ը: Ալումյանն ասաց, որ այդ գրքերը անգլերենով են, ուստի Քոչարյանը կարդում է անգլերենով: Դիտարկմանը, որ Շիրխանյանը կասկածի տակ էր դնում Քոչարյանի անգլերենը՝ Ալումյանն արձագանքեց՝ դա արդեն չգիտեմ:
Հռիփսիմե ՋԵԲԵՋՅԱՆ
