«Թշնամու մտադրությունն էր՝ վերցնել ողջ առաջնագիծը, ամբողջությամբ տիրապետել բնագծերին եւ ծնկի բերել հայկական զինուժին, որպեսզի քաղաքական իշխանությունն ընկներ իրենց ոտքերը: Բայց եղավ ճիշտ հակառակը: Ունեցանք այն, ինչ ունենք: Վերահաստատում եմ ճշմարտությունը, որ 4-րդ օրն Ադրբեջանը ռուսների միջոցով աղաչում-պաղատում էր, որ բանակցություններ լինեն, եւ հրադադար հաստատվի»,-Վ. Բրյուսովի անվան լեզվահասարակագիտական համալսարանում այսօր ապրիլյան ռազմական գործողություններում հերոսացած հայորդիներին նվիրված միջոցառման ժամանակ հայտարարեց ՀՀ Պաշտպանության նախարարի խորհրդական Վարդան Ավետիսյանը:
Նա հիշեցրեց, որ ապրիլյան ռազմական գործողությունների հետեւանքով հայկական կողմը կորցրեց մեկ բարձունք եւ չորս հենակետ. «Դա ճշմարտություն է, բայց մենք էլ հողմացրիվ արինք Ադրբեջանի մտադրությունը: Նա այլեւս չկարողացավ առաջ շարժվել: Եթե լիներ առաջ անցնելու կարգադրություն՝ հրաման, բնականաբար, մենք կանցնեինք հակահարձակման: Բայց, քանի որ արդեն բանակցություններ էին ընթանում, մենք կանգնեցինք այնտեղ, որտեղ այսօր կանգնած ենք: Ժամանակ գա՝ մենք հետ ենք վերցնելու դրանք, դրանք կրկին մերն են լինելու»:
Ի դեպ, այս օրերին ԶԼՄ-ներում գնահատականներ են հնչում այն մասին, որ հարցազրույցներից մեկում Վարդան Ավետիսյանն ասել է, թե հետախուզությունը նախապես է իմացել հակառակորդի նախապատրաստելիք հարձակման մասին: Այս առնչությամբ Aravot.am-ի հարցերին պատասխանել Վարդան Ավետիսյանը հրաժարվեց:
Այլ մանրամասները՝ տեսանյութում
Կարդացեք նաև
Լուիզա ՍՈՒՔԻԱՍՅԱՆ
