«Բլից Ինֆո» մամուլի ակումբում հյուրընկալված Մատենադարանի միջնադարյան ժողովրդական մշակույթի ձեռագիր աղբյուրների հետազոտման խմբի գիտական ղեկավար, պրոֆեսոր, բանասիրական և պատմական գիտությունների դոկտոր Արծրունի Սահակյանը լրագրողներին տեղեկացրեց, որ Մատենադարանի տնօրեն Վահան Տեր-Ղևոնդյանն օրերս փակել է իր ղեկավարած գիտահետազոտական խումբը, ինչ համարում է անձնական հաշվեհարդարի հետևանք։
«Երջանկահիշատակ Թամրազյանից հետո նա պետք է պաշտպաներ դոկտորական, որպեսզի դառնար տնօրեն: Արագ պաշտպանելու հետեւանքով թերի աշխատանք էր ներկայացվել: Ես էլ եղել եմ այն ժամանակվա ԲՈՀ-ի գաղտնի գրախոսը իր աշխատանքի: Եվ հավատարիմ իմ գիտական սկզբունքներին` չեմ ասել, որ նա իմ կրտսեր ընկերն է, ու գաղտնի, անաչառ կարծիք եմ տվել: Անաչառ կարծիքը, սակայն, գաղտնազերծվել է, փաստորեն օրենքի խախտում է տեղի ունեցել»:
Մանրամասն տեսանյութում
Կարդացեք նաև
Արծրունի Սահակյանը նշեց, որ ժողովրդական մշակույթի հետազոտման համար առանձին գիտական խումբ էր ստեղծվել, ու գիտպետկոմը տարեկան 2 մլն դրամ էր հատկացնում:
«Մեր խումբը մինչեւ օրս աշխատել է ու լծվել իր գործին, մատենաշար ենք հիմնադրել, երկու-երեք մենագրություն ենք լույս ընծայել, չորրորդը պատրաստ է, հինգերորդը պլանի մեջ, բայց պարզվեց, որ այս ամենը ոչինչ է Մատենադարանի կառուցվածքային փոփոխությունների առջեւ:
Սկզբում փորձեցին այս ամենին գիտական հիմնավորում տալ, իբր նոր առաջարկվող կառուցվածքային տրամաբանությանը չի համապատասխանում, թեմաներով զբաղվող չկա, մեկի թեման ուրիշ է գրանցած, իբր իմ թեման` Մարաբ Մծուրնացին, ժողովրդականի հետ կապ չունի»,- ասաց Արծրունի Սահակյանը:
Նա նշեց, որ հոգաբարձուների խորհրդի նիստում հենց սկզբից խորհրդանշական ինչ-ինչ դրսեւորումներ են եղել, օրինակ, մի խումբ աշխատակիցներ առաջարկել են, որ խորհրդի նիստը փակ լինի մյուս աշխատակիցների եւ ԶԼՄ-ների համար: Արծրունի Սահակյանի կարծիքով, նիստը փակ հրավիրելու պատճառներից մեկն էլ աուդիտի խնդրի պատճառով էր:
Արծրունի Սահակյանի ձեւակերպմամբ, Մատենադարանի ներկայիս միտումն է համահարթեցված աշխատողներ ունենալը:
Ի դեպ, Armtimes.com-ի հետ զրույցում Վահան Տեր-Ղեւոնդյանն ասել էր, որ ձեռնարկված փոփոխությունները կապ չունեն իր դոկտորական ատենախոսությանն առնչվող կոնֆլիկտի հետ եւ կատարվող փոփոխությունների մասին հիշատակված է եղել իր նախընտրական ծրագրում: Նա նաեւ վստահեցրել էր, որ փոփոխությունների արդյունքում մարդիկ աշխատանքից չեն հեռացվելու եւ չեն ընդհատվելու նրանց գիտական թեմաները: Նրանք շարունակելու են աշխատել իրենց բաժիններում:
Գոհար ՀԱԿՈԲՅԱՆ
