Պահքի ավարտին մնաց մեկ շաբաթ: Եվս մեկ պահքի ուտեստ, որը շատ սննդարար է, բազմաթիվ օգտակար նյութերով հարուստ, ու ամենակարեւորը՝ շատ համեղ:
Անհրաժեշտ մթերքները
Ոսպ- 1 բաժակ
Կարդացեք նաև
Գլուխ սոխ- 1 հատ
Սխտոր-2 պճեղ
Գազար-2 հատ
Կարտոֆիլ-2 հատ
Լոլիկի մածուկ-1 ճաշի գդալ
Կարմիր պղպեղի մածուկ- 1 ճաշի գդալ (եթե չունեք՝ լոլիկի մածուկի քանակը կրկնապատկեք)
Համեմունքներ՝ ըստ ճաշակի (օրինակ՝ քարրի փոշի կամ խմելի սունելի՝ 1 թեյի գդալ)
Ալյուր- 2 ճաշի գդալ
Բուսական յուղ- 4 ճաշի գդալ
Աղ- 1 ճաշի գդալ
Չորացրած կանաչիներ (ուրց, ծիթրոն,հազրեվարդ, պրովանսյան կանաչիների խառնուրդ)- 1 ճաշի գդալ
Թարմ կանաչիներ- համեմ, մաղադանոս, եթե ունեք՝ հազրեվարդ (розмарин) եւ ուրց կամ միջերկրական ուրց (тимьян)- մի քանի ճյուղ
Պատրաստման եղանակը
Ոսպը լավ լվանալ, լցնել կաթսայի մեջ, վրան լցնել այնքան ջուր, որ ծածկվի, եւ թողնել մոտ 2 ժամ: Երկու ժամից ոսպն արդեն ջուրը քաշած եւ փքված կլինի, ավելացրեք եւս մի լիտր ջուր եւ դրեք կրակին: Կես ժամից 1 ոչ լիքը ճաշի գդալ աղ արեք, թող եփվի եւս 5-10 րոպե եւ անջատեք:
Մինչ ոսպը եփվում է, մաքրեք եւ լվացեք բոլոր բանջարեղենները՝ գազար, կարտոֆիլ, սոխ, սխտոր, կանաչիներ: Սոխն ու սխտորը մանր կտրատեք, իսկ գազարն ու կարտոֆիլը՝ մի քանի կտորի բաժանեք:
Մեկ այլ կաթսայի մեջ բուսական յուղը տաքացրեք, ավելացրեք սոխը, մեկ երկու րոպեից՝ սխտորը, ապա՝ գազարը: Մի քանի րոպե տապակվելուց հետո ավելացրեք լոլիկի եւ պղպեղի մածուկները, համեմունքները, չորացրած կանչիները, լավ խառնեք, ավելացրեք ալյուրը, ապա՝ շերեփ առ շերեփ ավելացրեք եփված ոսպից՝ հեղուկով հանդերձ: Ամեն շերեփն ավելացնելիս՝ լավ խառնեք: Ավելացրեք նաեւ կտրատած կարտոֆիլը: Թողեք եփվի 15-20 րոպե, որից հետո կափարիչով փակեք, թողեք մնա եւս 10 րոպե, որից հետո ձեռքի բլենդերով ապուրը դարձրեք ապուր-պյուրե: Հարելուց հետո նոր ավելացրեք մանր կտրատած կանչիները եւ մատուցեք:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
