Ռուսաստանում առաջին անգամ գործ է հարուցվել ֆեյք նորությունների մասին նոր օրենքի շրջանակում:
Ակտիվիստ Ելենա Կալինինան մեղադրվում է լրատվամիջոցներով «ոչ հավաստի հանրային նշանակության տեղեկատվության տարածման համար, որը հանգեցրել է տրանսպորտային ենթակառուցվածքների գործունեության խաթարմանը»:
Նման արձանագրություն կազմելու պատճառ է դարձել «ՎԿոնտակտե» սոցցանցում Կալինինայի այն հրապարակումը, որ ապրիլի 7-ին Արխանգելսկում ցույցեր ու հանրահավաքներ են տեղի ունենալու: Ոստիկանները գտել են, որ Կալինինան հրապարակել է ակնհայտ ոչ հավաստի տեղեկատվություն, քանի որ իմացել է, որ միջոցառումները համաձայնեցված չեն և չեն կարող անցկացվել:
Ընդ որում, միջոցառումն այնուամենայնիվ տեղի ունեցել է: Քաղաքային վարչակազմը մասնակիցների թիվը գնահատել է 2300, իսկ իրենք՝ ակտիվիստները՝ 5000 մարդ: Ըստ արձանագրության՝ ակցիան հանգեցրել է «հասարակական կարգի մասսայական խաթարման». արգելափալվել է փողոցների անցանելի հատվածը, և խոչընդոտներ են ստեղծվել հանրային տրանսպորտի համար:
Կարդացեք նաև
Ուշագրավ է, որ այդ գործողության համար Կալինինան արդեն երկու անգամ պատասխանատվության ենթարկվել է՝ առանձին ցույցերի, և առանձին՝ հանրային միջոցառումներ անցկացնելու կոչերի համար: Այժմ էլ փաստորեն նույն գործողության համար նրա դեմ ևս մեկ գործ է հարուցվել, ինչը, ըստ փաստաբանների, Սահմանադրության և Մարդու իրավունքների պաշտպանության կոնվենցիայի խախտում է:
Պատրաստեց՝ Վիկտորյա ԱՆԴՐԵԱՍՅԱՆԸ
