Մայիսի 17-ին Ժնեւի հանրահայտ «Վիկտորիա հոլ» համերգասրահում կկայանա աշխարհահռչակ դաշնակահարուհի Խատիա Բունիաթիշվիլիի մենահամերգը: Ինչպես Aravot.am-ի հետ զրույցում նշեց շվեյցարաբնակ ճանաչված մեցցո սոպրանո Վարդուհի Խաչատրյանը, Խատիա Բունիաթիշվիլիի համերգին, որ նվիրված է Կոմիտասի ծննդյան 150-ամյակին, կհնչեն Լիստ, Շուբերտ եւ Կոմիտասի պարեղանակները:
Համերգի կազմակերպիչն է Ժնեւի «Ավետիս» մշակութային կազմակերպությունը, որի հիմնադիրն ու նախագահը Վարդուհի Խաչատրյանն է: «Ավետիսը» երրորդ անգամ է հրավիրում ճանաչված դաշնակահարուհուն: «Խատիան իր Ժնեւյան համերգներին արդեն կատարել է Կոմիտասի եւ Բաբաջանյանի ստեղծագործություններից»,-նշեց մեր զրուցակիցը:
Վարդուհի Խաչատրյանը նաեւ տեղեկացրեց, որ դեկտեմբերին «Ավետիսը» կներկայացնի Խատիա եւ Գվանցա Բունիաթիշվլիներին Ցյուրիխում: Նրանք հանդես կգան Tonhalle Maag համերգասրահում, եւ դա կլինի «Ավետիսի» առաջին համագործակցությունը Tonhalle-ի հետ: Մեցցո սոպրանոն նաեւ տեղեկացրեց, որ Ժնեւյան համերգի բոլոր տոմսերը վաճառված են, ուստի շատերը, որ չեն կարողանա տեղ զբաղեցնել համերգասրահի 1700 տեղանոց դահլիճում, անհամբեր սպասում են Ցյուրիխյան համերգին:
Աշնանը «Ավետիսը» Ժնեւի «Վիկտորիա հոլում» կներկայացնի նաեւ Տիգրան Համասյանին: Նա հանդես կգա Կոմիտասի ստեղծագործությունների ջազային մշակումներով
Կարդացեք նաև
Գոհար ՀԱԿՈԲՅԱՆ
Խատիա Բունիաթիշվիլիի լուսանկարը՝ նրա ֆեյսբուքյան էջից
