Երեկ՝ օգոստոսի 31-ին, Արցախի հանրապետության նախագահ Բակո Սահակյանը հրամանագիր է ստորագրել ու «Երախտագիտություն» մեդալով պարգեւատրել է Ռուսաստանի հայերի միության Կամչատկայի երկրամասի տարածաշրջանային բաժանմունքի նախագահ Արթուր Խաչատրյանին՝ Արցախի հանրապետությունում մի շարք ծրագրերի իրականացմանը ցուցաբերած գործուն մասնակցության համար:
«Երախտագիտություն» մեդալով պարգեւատրվում են այն անձինք, կազմակերպությունները, որոնք ծանրակշիռ ավանդ են ներդրել ԼՂՀ տնտեսության, գիտության, մշակույթի, սոցիալական ոլորտի վերականգնման եւ զարգացման գործում ու նպաստել ԼՂՀ պաշտպանությանն ու միջազգային ճանաչմանը:
Կարդացեք նաև
Արթուր Խաչատրյանն իր օրինակով ցույց էր տվել, թե ինչպես կարելի է ավանդ ունենալ Հայաստան-Արցախ-Սփյուռք եռամիասնության ամրապնդման ու զարգացման կարեւոր գործում: Արցախի սահմանամերձ համայնքներից մեկը՝ Քաշաթաղի շրջանի Որոտան քաղաքը շուրջ 630 բնակիչ ունի, համայնքում դպրոց չկա ու 90 դպրոցահասակ երեխաները ամեն օր ստիպված էին լինում 30 կմ հեռավորություն հաղթահարել, հարեւան Հայկազյան համայնքի կրթօջախ հաճախել: Այժմ այդ խնդիրը հաղթահարված է: Որոտանի քաղաքապետ Վրույր Ասրյանը համայնքի ողջ բնակչության, ուսուցչական կոլեկտիվի եւ աշակերտների անունից իր շնորհակալությունն էր հայտնել Արթուր Խաչատրյանին: Սահմանամերձ գյուղի դպրոցները նաեւ ապահովվել են համակարգչային տեխնիկայով:
Մեզ հետ զրույցում Արթուր Խաչատրյանն ասաց, որ Արցախ աշխարհի զարգացումն ու պետականության ամրապնդումը ապահովելու համար հարկավոր է ողջ հայության ներուժը համախմբել, միայն այդպես մենք կարող ենք հասնել ամրագրված ազգային նպատակադրումների կենսագործմանը. «Այստեղ պետք է յուրաքանչյուրիս պատասխանատվությունն ու ջանքը: Հայաստան-Արցախ-Սփյուռք եռամիասնության համագործակցությունը շատ կարեւոր դեր ունի հայ ժողովրդի անվտանգ գոյատեւման, մեր ազգային շահերի առաջմղման եւ ողջ հայ ժողովրդի հավաքական նպատակների արդյունավետ իրագործման առումով»:
Հիշեցնենք, որ սա Արթուր Խաչատրյանի առաջին պարգեւատրումը չէ Արցախում: Հատուկ արժանիքների եւ ներդրած ավանդի համար նրան շնորհվել էր «Մայրական երախտագիտություն» պատվավոր մեդալը:
Արթուր Խաչատրյանին ոսկե մեդալով պարգեւատրել էր նաեւ ՀՀ կառավարությունը, մասնավորապես՝ սփյուռքի նախարարությունը՝ Կամչատկայի հայ համայնքի ձեւավորման եւ կայացման գործում անչափ մեծ ավանդի ու դերակատարության համար:
