Հայաստանում Ֆրանսիական համալսարանում կայացավ Էրազմուս + ծրագրի «Եվրոպական ինտեգրացիային համահունչ բարձրագույն կրթության 3-րդ աստիճանի որակի ապահովման համակարգի ներդրում՝ խթանելու հետազոտությունների միջազգայնացումը» (C3QA) նախագծի արդյունքների հանրայնացման եզրափակիչ համաժողով:
Նախագիծը, որի շրջանակում մշակվել է երրորդ աստիճանի (դոկտորական) ծրագրերի որակի արտաքին ապահովմանն ուղղված քաղաքականության մոտեցումներ, չափանիշներ և չափորոշիչներ Հայաստանի, Ղազախստանի, Մոնղոլիայի և Ուկրաինայի բարձրագույն կրթության համակարգերի համար, 2016 թվականից համակարգում է Հայաստանում ֆրանսիական համալսարանը:
Համաժողովի բացմանը ներկա էին ՀՀ Կրթության, գիտության, մշակույթի և սպորտի նախարարի տեղակալ Արևիկ Անափիոսյանը, Հայաստանում Ֆրանսիայի դեսպան Ջոնաթան Լաքոտը, Հայաստանում ԵՄ պատվիրակության ղեկավար, արտակարգ և լիազոր դեսպան Անդրեա Վիկտորինը, Հայաստանում Էրազմուս+ ծրագրի ազգային գրասենյակի համակարգող Լանա Կառլովան:
ՀՀ-ում Ֆրանսիայի դեսպան Ջոնաթան Լաքոտը նաեւ ուրախությամբ փաստեց ծրագրի եզրափակիչ փուլի` Հայաստանում անցկացվելը:
Կարդացեք նաև
Դեսպանի ձեւակերպմամբ, կրթության երրորդ աստիճանը համալսարանը բնորոշող տարրերից է, հետեւաբար ցանկացած իրեն հարգող համալսարան պետք է ունենա հետազոտական աշխատանքների մաս:
«Բոլորը գիտեն, որ ասպիրանտուրան համալսարանների համար կարևոր և էական տարր է։ Մենք հնարավորություն ունեցանք համակարգելու այս նախագիծը, և սա հիասքանչ առիթ է մտքերի փոխանակման, տարբեր երկրների փորձերը համատեղելու համար»,-նշեց ՀՖՀՀ ռեկտոր Ժան-Մարկ Լավեստը:
Հավելենք, որ համաժողովը անդրադառնում է երկու մեծ թեմաների՝ երրորդ աստիճանի (դոկտորական) ծրագրերի քաղաքականության մոտեցումներին և որակի ապահովման արտաքին/ներքին համակարգերին։ Այն թիրախում է կրթական քաղաքականության մշակողներին, բարձրագույն կրթության և հետազոտական հաստատությունների ուսանողներին, ուսումնական ու վարչական անձնակազմին, որոնք առնչվում են երրորդ աստիճանի ծրագրերի կառավարմանը, տրամադրմանը և որակի ապահովմանը։
Անի ԱՍԱՏՐՅԱՆ
Լուսանկարը` Հայաստանում Ֆրանսիական համալսարանի ֆեյսբուքյան էջից
