ԵԱՀԿ Մինսկի խմբի նախարարների խորհրդի նիստի շրջանակում ՄԽ համանախագահ երկրների պատվիրակությունների ղեկավարներ Ռուսաստանի արտգործնախարար Սերգեյ Լավրովը, Ֆրանսիայի Եվրոպական և արտաքին գործերի նախարարության պետքարտուղար Ժան Բամտիստ Լեյմոնը, ԱՄՆ եվրոպական և եվրասիական հարցերով պետքարտուղարի օգնական Ֆիլ Ռիկերը հավատարիմ են Լեռնային Ղարաբաղի հակամարտության միջնորդության գործին: Այս մասին ասվում է համանախագահ երկրների համատեղ հայտարարության մեջ:
Պատվիրակության ղեկավարները նկատել են, որ շփման գծում և միջազգային սահմանի երկայնքով հրադադարի խախտման դեպքերը համեմատաբար քիչ են և գոհունակություն են հայտնել,որ կողմերը լիարժեք կերպով օգտագործում են հաղորդակցության միջոցները լարվածությունը թուլացնելու համար: «Մենք ողջունում ենք անցյալ տարի ձեռնարկված կոնկրետ միջոցները լարվածությունը թուլացնելու և ժողովուրդներին խաղաղության նախապատրաստելու ուղղությամբ,- ասվում է հայտարարության մեջ:- Մենք գնահատում ենք լրագրողների փոխանակման շուրջ իրականացված և գերիներին ազատ արձակելու շուրջ ջանքերը:
Հայտարարության մեջ նշվում է,որ այդ քայլերը կարևոր դեր են խաղում կառուցողական և էական բանակցություններ վարելու համար մթնոլորտ ձևավորելու համար:
Հայտարարության հեղինակները կոչ են արել կողմերին կոնկրետ քայլեր ձեռնարկել իրականացնելու մարդասիրական և անվտանգության միջոցառումների իրականացման շուրջ ձեռք բերված պարտավորությունները և աջակցել Կարմիր խաչի միջազգային կազմակերպությանը անհետ կորած անձանց վերաբերյալ տվյալների փոխանակման գործում: Համանախագահ երկրները նաև կարևորում են ԵԱՀԿ համանախագահի անձնական ներկայացուցիչի առաքելության կարևորությունը և առաջարկում քննարկումներ սկսել նրա առաքելությունն ընդլայնելու ուղղությամբ, ինչպես որ պայմանավորվել էին 2016թ.:
Կարդացեք նաև
Պատվիրակությունների ղեկավարները վերահաստատում են, որ արդար և երկարատև կարգավորումը պետք է հիմնված լինի, մասնավորապես, ուժի չկիրառման, տարածքային ամբողջականության և ժողովուրդների ինքնորոշման և հավասար իրավունքների վերաբերյալ Հելսինկյան եզրափակիչ ակտի սկզբունքների վրա՝ վկայակոչելով համանախագահ երկրների պատվիրակությունների ղեկավարների և Ադրբեջանի ու Հայաստանի ԱԳ նախարարների՝ 2009-ին Աթենքում նախարարական խորհրդի հանդիպման ավարտին արված համատեղ հայտարարությունը: Այն պետք է ներառի նաև հավելյալ կետեր, որոնք առաջարկվել են համանախագահող երկրների նախագահների կողմից 2009-2012 թթ-ին:
Համանախագահները ևս մեկ անգամ շեշտել են, որ ստատուս քվոն անընդունելի է և որ հակամարտությունը ռազմական լուծում չունի:
Պատվիրակությունների ղեկավարները կոչ են անում կողմերին՝ բարեխիղճ առարկայական բանակցություններ վարել՝ առանց ձգձգումների կամ պայմանների:
Պատրաստեց՝ Վիկտորյա ԱՆԴՐԵԱՍՅԱՆԸ
