Aravot.am-ը Խ.Դաշտենցի անվան 114 դպրոցի տնօրեն Ռուզաննա Կոստանյանից հետաքրքրվեց՝ ինչպե՞ս է տեղի ունեցել դանակահարության դեպքը 11-րդ դասարանցիների միջեւ, որի մասին տեղեկացրել էր shamshyan.com-ը:
«Դասամիջոցին խաղացել են 11-րդ դասարանցի տղաները, գնդակը կպել է նրանցից մեկին, մյուսն ասել է` արա՛, զգույշ: Նա էլ թե` ո՞նց թե, արա: Անիմաստ տեղը դանակով խփել է մյուս տղայի ոտքին: Առաջին բուժօգնությունը մեզ մոտ ենք ցույց տվել, ծնողներին կանչեցինք, ոստիկաններ կանչեցինք, ոստիկանները տարան:
Չի կարելի ախր, բայց շաբաթը մեկ աշակերտների գրպանները ոստիկանները ստուգում են: Չես հասկանում` էդ երեխեքն ընդհանրապես ի՞նչ են ուզում», – ասաց դպրոցի տնօրենը: Հավելեց, որ բարեբախտաբար, միջադեպի մասնակից աշակերտների ծնողների միջեւ բախում չի եղել, որովհետեւ ըմբռնումով են մոտեցել կատարվածին:
«Նույնիսկ տուժածի հայրն ասում է` տիկին Կոստանյան, ի՞նչ կարիք կար ոստիկանություն կանչել, հիմա տղա երեխեք են, մի բան է, եղել է»,- նշեց մեր զրուցակիցը:
Կարդացեք նաև
Տնօրենը հավելեց, որ արդեն ամեն ինչ կարգին է, ուղղակի նեղսրտած է, որ նման միջադեպը կարող է ստվեր գցել դպրոցի վրա:
Գոհար ՀԱԿՈԲՅԱՆ
Լուսանկարը` դպրոցի ֆեյսբուքյան էջից:
