Գյումրու 2020 թվականի բյուջեի նախագիծը քննարկելիս՝ խոսք գնաց զբոսաշրջիկների բավական մեծ հոսք ունեցող այս քաղաքում հասարակական զուգարաններ չունենալուց։
«Մեր, այսպես ասած, ամենաբաց հարցը, որը բոլորին է հետաքրքրում, քաղաքային զուգարանների խնդիրն է, որը փորձում ենք լուծել դոնորների միջոցներով, մեր միջոցներով լուծել հնարավոր չէ։ Մենք ունենք 10 զուգարաններ՝ ժամանակավոր օգտագործելու համար, բայց փորձը ցույց տվեց, որ տեղադրելուց հետո մի քանի օրից կարող է հօդս ցնդել՝ իր ամբողջ եղած-չեղածով, դրա համար այս պահի դրությամբ խուսափում ենք մեր ունեցածը կիրառելու՝ բացառությամբ լայնամասշտաբ հանրային միջոցառումների ժամանակ։ Այս տարի բյուջեով չենք նախատեսել, այդ ծրագրերը պետք է իրականացնենք միջազգային դոնոր կազմակերպությունների ծրագրերի շրջանակներում»,-ասաց Գյումրու քաղաքապետի խորհրդական Արարատ Բալաբեկյանը։
Գյումրու փոխքաղաքապետ Ռուբեն Սանոյանն էլ հավելեց, որ մի ներդրող իրենց դիմել է կենտրոնում շինթույլտվություն ստանալու համար, այն ընթացքի մեջ է։ Այնպես որ կենտրոնում մի զուգարան կլինի։
Գյումրու ավագանու անդամ Լուսինե Սանոյանն էլ նկատեց, որ շաբաթ-կիրակի օրերին ահռելի քանակությամբ զբոսաշրջիկների հոսք կա Գյումրի։ «Սա գերխնդիր է, որևէ այլ երկրի այլ քաղաքում չես տեսնի, որ տվյալ վայրից 20 մետր հեռավորության վրա զուգարան չլինի։ ԹԵկուզ վճարովի, պետք է լինի»,-ասաց ավագանու անդամը։
Կարդացեք նաև
Լուսինե Սանոյանն առաջարկեց՝ թեկուզ համայնքապետարանի համաֆինանսավորմամբ լուծել այդ հարցը։ Քաղաքապետի Խորհրդական Արարատ Բալաբեկյանը նշեց, որ բոլոր ծրագրերը, այդ թվում միջազգային դոնոր կազմակերպությունների իրականացրածները պահանջում են ներդրում համայնքի կողմից։ Վերջինս հայտարարեց, որ քաղաքը պատրաստ է ներդրման։
Ի դեպ, ավագանու անդամի ու քաղաքապետի խորհրդականի հարցուպատասխանից նաև հայտնի դարձավ, որ մի կազմակերպություն հաշվարկներ է իրականացնում Գյումրիում վճարովի զուգարաններ տեղադրելու։
Նունե ԱՐԵՎՇԱՏՅԱՆ