Արևմտյան մամուլը անդրադարձել է ԱՄՆ Սենատի կողմից Հայոց ցեղասպանության ճանաչման բանաձևին:
Մասնավորապես, բրիտանական The Guardian-ը գրում է, թե ԱՄՆ Սենատը միաձայն քվեարկեց Հայոց ցեղասպանության բանաձևի օգտին, չնայած ԱՄՆ և Թուրքիայի նախագահների դիմադրությանը, գրում է. «Մինչ այժմ Թուրքիան օգտագործում էր իր լծակները՝ որպես ԱՄՆ-ի և ՆԱՏՕ-ի դաշնակից՝ խեղդելու Հայոց ցեղասպանության ճանաչումը, և սպառնում էր երկկողմ հարաբերությունների համար հետևանքներով: Սպիտակ տունը, ցանկանալով չսրել Էրդողանի հետ առանց այն էլ լարված հարաբերությունները, փորձում էր ձգձգել Սենատի քվեարկությունը»,- նկատում է թերթը:
«Սենատը հավանություն տվեց Հայոց ցեղասպանությունը ճանաչող բանաձևին ՝ դատապարտելով Թուրքիային՝ չնայած Սպիտակ տան կողմից դիմակայությանը»,- գրում է ամերիկյան հեղինակավոր The Wall Street Journal պարբերականը:
«Հայտնի չէ՝ արդյոք պարոն Թրամփը կմեկնաբանի այս բանաձևը, որը նա պարտավոր չէ ստորագրել, քանի որ այն պարտավորեցնող բանաձև չէ: Սպիտակ տան պատասխանատուները չեն պատասխանել ընդունումից անմիջապես հետո մեկնաբանություն տալու խնդրանքին: Թուրքիայի կառավարությունը նախազգուշացրել է, որ բանաձևի ընդունումը կարող է վնասել Անկարայի և ԱՄՆ-ի հարաբերություններին»,- գրում է թերթը:
Կարդացեք նաև
«Սենատը երեքշաբթի ընդունեց բանաձև, որը պաշտոնապես ճանաչում է 1915-1923թթ. հայերի զանգվածային սպանությունները՝ որպես ցեղասպանություն, քայլ, որին Թուրքիայի կառավարությունը երկար դիմադրում էր»,- գրում է CNN-ն իր կայքում՝ հիշեցնելով, որ ավելի վաղ նույնպիսի բանաձև ընդունվել էր Ներկայացուցիչների պալատում:
«Չորրորդ փորձից Սենատն ընդունեց բանաձև, որով ճանաչում է Օսմանյան Թուրքիայում մեկ դար առաջ տեղի ունեցած հայերի սպանությունները որպես ցեղասպանություն»,- գրում է մեկ այլ հեղինակավոր թերթ՝ Los Angeles Times-ը՝ հիշեցնելով, որ բանաձևի ընդունումը երեք անգամ Սպիտակ տան պահանջով արգելափակվել էր:
Reuters-ը ԱՄՆ Սենատի կողմից բանաձևի ճանաչումը որակում է որպես «պատմական քայլ, որը զայրացրել է Թուրքիային և հարված է հասցնում Անկարայի և Վաշինգտոնի՝ առանց այն էլ խնդրահարույց հարաբերություններին»:
«Տասնամյակներ շարունակ ԱՄՆ Կոնգրեսում արգելափակվել են Հայոց ցեղասպանությունը ճանաչող միջոցառումները, ինչը պայմանավորված էր Թուրքիայի հետ հարաբերությունների շուրջ մտահոգություններով և Անկարայի կողմից ակտիվ լոբբինգով»,- գրում է գործակալությունը:
Պատրաստեց՝ Վիկտորյա ԱՆԴՐԵԱՍՅԱՆԸ
