Մխիթար Հերացու անվան համալսարանական հիվանդանոցի պլաստիկ վիրաբուժության եւ միկրովիրաբուժության բաժանմունքի ղեկավար եւ պլաստիկ վիրաբուժության ամբիոնի վարիչ Արտավազդ Սահակյանն Aravot.am-ին փոխանցեց. «Մեր մասնագետները դեկտեմբերի 31-ի ժամը 22:30-ից աշխատել են լրիվ ծանրաբեռնվածությամբ եւ հիմա էլ շարունակում են նույն տեմպով: Ամանորի գիշերը միայն մեր բաժանմունքում իրականացվել է 14 վիրահատություն, որից 12-ը՝ հրավառ նյութերից ստացված վնասվածքների եւ այրվածքների: Համոզված եմ, որ հանրապետության մասշտաբով այս թիվն անհամեմատ մեծ է:
Մենք արդեն 10 տարուց ավելի Նոր տարվան նախորդող օրերին նախազգուշացնում եւ ահազանգում ենք, որպեսզի ազգաբնակչությունը զերծ մնա հրավառ նյութեր օգտագործելուց, մանավանդ, որ դրանք որպես կանոն չինական արտադրության են եւ անորակ: Սակայն մեր կոչերն ու հորդորները, ինչպես երեւում է, տեղ չեն հասնում:
Կրկին անգամ դիմում եմ կառավարությանը, որպեսզի մաքսակետերում վերահսկողությունը խստացվի անորակ հրավառ նյութերի ներկրման վրա եւ որ ավելի ճիշտ կլինի, դրանց ներկրումը Հայաստան ընդհանրապես արգելել»:
Աշոտ ՀԱԿՈԲՅԱՆ
