Ինչպես հայտնի է, այսօր Երևան քաղաքի Պարույր Սևակի փողոցի 8/1 շենքի բնակարաններից մեկում հայտնաբերվել է ԱԱԾ նախկին պետ Գեորգի Կուտոյանի դին՝ հրազենային վիրավորումով: Դեպքի վայրում քննչական գործողություններ են ընթանում: ՀՀ Քննչական կոմիտեի փոխնախագահ ՀՀ ՔԿ ՀԿԳ քննության գլխավոր վարչության պետ Արթուր Մելիքյանը որոշ տեղեկություններ տվեց լրագրողներին:
Քննչական գործողությունների ավարտից հետո Արթուր Մելիքյանը քիչ առաջ նոր տեղեկություններ հայտնեց: Նա ասաց, որ դեպքի վայրում հայտնաբերված զենքը օրինական զենք է, իրեն է պատկանել, պարգեւատրման կարգով է հանձնվել. «Վրաստանի անվտանգության ծառայության ղեկավարի կողմից է ստացել: Կան բազմաթիվ պարկուճներ եւ գնդակներ, այն սենյակում, որտեղ դին հայտնաբերվել է, պատերին կան վնասվածքներ: Դեպքի վայրում կնոջ եւ հոր մասնակցությամբ այս պահին էլ գործողություններ են կատարվում, որեւէ այլ անձ չի եղել դեպքի վայրում, միայն քրեագետներ, քննիչներ եւ օպերատիվ աշխատողներ: Քրեական գործ է հարուցվել 110 հոդվածի 1-ին մասով»:
Պարոն Մելիքյանը հորդորեց հոդվածին առերեւույթ չխաբվել: Նշենք,որ 110 հոդվածի 1-ին մասը ինքնասպանությանը հասցնելուն է վերաբերվում. «Ունենք հետեւյալ դեպքը, հայտնաբերվել է Կուտոյանի դին, այս պահին գործը հարուցվել է 110 հոդվածով, բայց բազմաթիվ վարկածներ կան, կարող է լինել սպանություն, կարող է լինել սպանություն՝ քողարկված ինքնասպանությամբ, այս պահին բազմաթիվ վարկածներ ենք դիտարկում: Համալիր փորձաքննություններով եւ մի շարք քննչական գործողությունների արդյունքով ընդհանուր պատկերը պարզ կլինի, թե ինչ է տեղի ունեցել: Քրեական գործը հարուցվել է այս պահին ինչ տվյալներ ձեռքի տակ ունենք՝ այդ փաստով: Տեսաձայնագրություններն արդեն խմբի քննիչների կողմից առգրավման պրոցեսում են: Հրազենային վնավածք ունի քունքի շրջանում, դատաբժիշկների փորձաքննության արդյունքում ավելի ստույգ կպարզենք: Այն զենքը, որը հայտնաբերվել է՝ պարկուճները, գնդակները դրանի՞ց են արձակվել, թե՞ ոչ, պարզ կլինի ավելի ուշ:
Արթուր Մելիքյանն ասաց, որ որեւէ ցուցմունք հիմա չեն հրապարակի, թե ինչ են ասել կինը, հայրը:
Կարդացեք նաև
Ինչպես հայտնի է, մամուլում բազմաթիվ վարկածներ են քննարկվում ու տեղեկություններ կան, որ Կուտոյանի դիու կողքին կոնյակի դատարկ շիշ է եղել: Արթուր Մելիքյանն ասաց, որ փորձաքննությամբ կպարզվի՝ արյան մեջ ալկոհոլի քանակ կա՞, թե՞ ոչ, բայց շիշ գտնելու մասին ոչինչ չասաց:
Ուշագրավ է, որ ՔԿ փոխնախագահի խոսքով՝ դեպքի վայրում 3-4 տասնյակից ավելի պարկուճներ ու գնդակներ են եղել ու դեռ չունեն որեւէ տվյալ, որ որեւէ մեկը կրակոցի ձայն լսի:
Մելիքյանը հերքեց մամուլի այն տեղեկությունը,որ դիմածնոտային վնասվածք է ունեցել Կուտոյանը: Նա ասաց, որ արտաքին զննությամբ միայն քունքի շրջանում վնասվածքն է նկատելի եղել:
Ինչպես ավելի վաղ հայտնել էինք, դեպքի վայրում էին Սահմանադրական դատարանի նախագահ Հրայր Թովմասյանը, ինչպես նաեւ ԱԱԾ նախկին տնօրեն Արթուր Վանեցյանը, որոնց թույլ չեն տվել մտնել Կուտոյանի բնակարան: Հրայր Թովմասյանը նստեց ծառայողական մեքենա եւ հեռացավ, հնարավորություն չեղավ նրան հարցեր ուղղելու, որովհետեւ ոստիկանությունը շրջափակել էր տարածքը եւ թույլ չէին տալիս լրագրողներին մոտենալ: Արթուր Մելիքյանն ասաց, որ Հրայր Թովմասյանին անձամբ ինքը թույլ չի տվել ներս մտնել, իսկ Վանեցյանին ինքը չի տեսել:
Դեպքի վայրում էր նաեւ իրավապաշտպան Ռուբեն Մելիքյանը, նա շենքից դուրս եկավ, սակայն լրագրողների որեւէ հարցի չպատասխանեց:
Հռիփսիմե ՋԵԲԵՋՅԱՆ
