Այս թեթեւ, շատ համեղ եւ առողջարար աղցանը սովորաբար պատրաստում եմ Ամանորից հետո, երբ սառցախցիկից հանում եմ Ամանորյա ջեռեփ հնդկահավի մնացորդները: Սակայն մի քանի անգամ փորձել եմ նաեւ ապխտած, խաշած կամ տապակած հավի մսով, նույնպես շատ լավ է ստացվել: Այնպես որ՝ կարող եք վերցնել ինչպես հնդկահավ, այնպես էլ հավ՝ պատրաստված ցանկացած ձեւով:
Անհրաժեշտ մթերքները
Հնդկահավի եփած կտորներ- 300-400 գրամ
Կանաչ, թթվաշ խնձոր (ցանկալի է «սիմիրենկո» կամ «անտոնովկա» տեսակի )- 2 հատ
Կարդացեք նաև
Սեւ սալորաչիր- 20-25 հատիկ
Ընկույզ-2-25 հատիկ
Թարմ կանաչիներ (համեմ, սամիթ, մաղադանոս)- մի քանի ճյուղ
Թանձրուկի համար՝
քամած մածուն եւ թթվասեր՝ 3-ական ճաշի գդալ (կարող եք վերցնել միայն թթվասեր՝ 6-7 ճաշի գդալ)
սեւ պղպեղի սոուս (սուպերմարկետներում վաճառվում է)- 2 ճաշի գդալ
ձիթապտղի յուղ-3 ճաշի գդալ
աղ, սեւ պղպեղ- ըստ ճաշակի
Պատրաստման եղանակը
Խնձորները լավ լվացեք, կտրատեք ծղոտաձեւ: Սալորաչիրը նույնպես կտրատեք ծղոտաձեւ, իհարկե, նախապես հանելով կորիզները՝ եթե կորիզահան չէին: Կանաչին լավ լվացեք, շատ լավ չորացրեք, մանրացրեք: Հնդկահավի կամ հավի պատրաստի կտորները (ջեռոցում պատրաստված, խաշած կամ տապակած, կամ նույնիսկ՝ ապխտած) մանրացրեք՝ նույնպես ծղոտաձեւ: Կտրատեք նաեւ ընկույզը:
Լցրեք բոլորը մի թասի մեջ:
Պատրաստեք թանձրուկը՝ փոքրիկ խորը ամանի մեջ իրար խառնեք քամած մածունը, թթվասերը, սեւ պղպեղի թանձրուկը, աղը, սեւ պղպեղը եւ ձիթապտղի յուղը: Եթե չունեք սեւ պղպեղի թանձրուկ, ապա կարող եք այն փոխարինել մայոնեզով կամ մանանեխով, կամ պարզապես ոչինչ չավելացնել, սակայն փոխարենը աղացած սեւ պղպեղի քանակությունը մի փոքր մեծացրեք: Լավ խառնեք եւ ավելացրեք կտրատած մրգերի ու հնդկահավի վրա: Լավ խառնեք, թողեք կես ժամ մնա եւ մատուցեք:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
