Ազգային ժողովն այսօր քննարկում է կառավարության հեղինակած՝ «ՀՀ-ի պաշտպանության ժամանակ զինծառայողների կյանքին եւ առողջությանը հասցված վնասների հատուցման մասին» օրենքում փոփոխությունների օրինագիծն առաջին ընթերցմամբ ընդունելու հարցը:
Օրինագծի զեկուցող, ՀՀ Պաշտպանության փոխնախարար Գաբրիել Բալայանը հայտարարեց, որ ուրախությամբ է տեղեկացնում փոփոխության մասին, քանի որ ավելի վաղ ՊՆ-ն խոստացել էր դա անել. «Շահառուների շրջանակն ընդլայնվում է: Առաջակում ենք, որպեսզի հիմնադրամի (նկատի ունի հանրության շրջանում հայտնի «1000 դրամների» հիմնադրամը.-խմբ.) շահառուներ հանդիսանան ոչ միայն մարտական գործողությունների, մարտական հերթապահության կամ մարտական հատուկ առաջադրանքի կատարման ժամանակ վիրավորված/զոհված զինծառայողները եւ նրանց ընտանիքները, այլեւ հակառակորդի նախահարձակ գործողությունների հետեւանքով կյանքի եւ առողջության վնաս ստացած զինծառայողներն ու նրանց ընտանիքները»:
Փոխնախարարը հստակեցրեց, որ խոսքը վերաբերում է 2008թ.-ից ի վեր գրանցված դեպքերին:
Պատգամավորները հետաքրքրվեցին, թե ինչ է նշանակում «հակառակորդի նախահարձակ գործողությունների հետեւանքով» արտահայտությունը:
Կարդացեք նաև
Գաբրիել Բալայանը պարզաբանեց. «Խոսքը վերաբերում է ոչ միայն մարտական հերթապահության կամ հատուկ առաջադրանք կատարելուն, այլեւ՝ թիկունքում, բայց հակառակորդի որեւէ գործողության հետեւանքով գրանցված դեպքերին՝ հարձակում, հրթիռակործություն, դիվերսիա: Փոխհատուցումը լինելու է հիմնադրամից, խոսքը պետբյուջեի մասին չէ: Ի դեպ, այս պահի դրությամբ օրենքի իննը շահառու կա, իսկ երկուսի դեպքում սպասում ենք նախաքննական մարմնի որոշմանը»:
Հիշեցնենք, որ օրինագիծը դեռ պետք է քվեարկվի:
Լուիզա ՍՈՒՔԻԱՍՅԱՆ
