Իրավապաշտպանները պահանջում են ՊՆ փոխնախարար Գաբրիել Բալայանի հրաժարականը ու ասում, որ նոնսենս է, երբ ժողովրդավարական երկրում փոխնախարարը սպառնում է իրավապաշտպաններին:
Հիշեցնենք, որ Բալայանն ասել էր, թե իրավապաշտպաններ կան, որոնք քայքայիչ գործունեություն են ծավալում ու հրճվում բանակում դժբախտ դեպքերից:
Այսօր այս առնչությամբ լրագրողների հետ զրույցում Գաբրիել Բալայանն ասաց. «Մենք ունենք իրավապաշտպան կազմակերպություններ, քաղհասարակության անհատ ներկայացուցիչներ, որոնց հետ շատ լավ համագործակցություն է ընթանում ու շատ էֆեկտիվ հետեւություններ են արվում: Բայց, ցավոք, ոչ բոլոր դեպքերում է սա կիրառելի: Եթե առողջ քննադատություն կա, հավատացեք, առաջին շահառուն հենց մենք ենք, բայց պետք չի հրամցնել հասարակությանը, որ բանակը, զինծառայողը, սպաները, գեներալները վատն են, մնացած բոլորը լավն են: Հավատացեք, մեր հասարակության շատ անդամներ շատ բան ունեն սովորելու եւ գեներալների կյանքի փորձից եւ նրանց աշխարհայացքից, կազմակերպչական հմտություններից: Այսօրվա հաղթանակները, որ մենք տոնում ենք ու հպարտանում ենք տարբեր առիթով, հենց այդ գեներալների շնորհիվ են տեղի ունեցել»:
Բալայանն ասաց, որ ինքն իրականում որոշ իրավապաշտպանների մասին է խոսել ու իր ասածը չի վերաբերվել բոլոր իրավապաշտպաններին. «Կան իրավապաշտպաններ, որոնք մեզ շատ օգնում են իրականացնել հասարակության պահանջը ԶՈՒ-ում»:
Կարդացեք նաև
Հռիփսիմե ՋԵԲԵՋՅԱՆ
