Ժամերի ընթացքում կառավարությունը կհրապարակի ցանկը, որում հստակ նշված կլինի, թե առեւտրի ո՞ր կետերը կարող են աշխատել հանրապետությունում հայտարարված արտակարգ դրության պայմաններում: Այս մասին Aravot.am-ի հետ զրույցում ասաց միասնական տեղեկատվական շտաբի լրատվական բաժնի համակարգող, վարչապետի մամուլի խոսնակ Մանե Գեւորգյանը:
Մանե Գեւորգյանի լուսանկարը՝ ֆեյսբուքյան էջից
Հիշեցնենք, Հայաստանում կորոնավիրուսի համաճարակի արդյունքում հայտարարված արտակարգ դրության պայմաններում որոշ սահմանափակումներ եղան նաեւ առեւտրի կենտրոնների աշխատանքի հետ կապված: Երեկ վարչապետ Նիկոլ Փաշինյանը հայտարարեց, որ կառավարությունը նախատեսում է սահմանափակումները խստացնել: Քիչ ուշ կհրապարակվի կառավարության որոշումը, որում հստակ ցանկը ներկայացված կլինի:
Խնդիրն այն է, որ արդեն մի քանի օր է՝ ահազանգեր են լինում առեւտրի կենտրոնների հետ կապված: Մասնավորաբար, երեկվանից Aravot.am-ն ահազանգեր է ստանում, որ Էջմիածնի կենտրոնում գտնվող չորս հարկանի հանրախանութի, որն առեւտրի փակ կենտրոն է, սեփականատերը որոշել է բացել կենտրոնը եւ աշխատակիցներին`տարածք վարձակալած քաղաքացիներին, տեղեկացրել`անկախ նրանից, թե աշխատելու են իրենց առևտրի կետերը, թե ոչ, պետք է վճարեն օրվա վարձի գումարը: Նույն իրավիճակն է նաեւ հարեւանությամբ գտնվող բացօթյա առեւտրի կենտրոնում, որը տեղացիները «լեժանկաներ» են անվանում: Այսօրվանից առեւտրի կենտրոնի սեփականատերը բացել է կենտրոնը` նույն տարբերակով: Որոշ մարդիկ ստիպված աշխատում են, քանի որ օրվա վարձավճարը պետք է տան:
Նախորդ օրերին համանման խնդիրներ առաջացան նաեւ «Առինջ մոլի» հետ կապված: Մոլի փոխտնօրեն, Երևանի ավագանու ԲՀԿ խմբակցության անդամ Արմեն Ներսիսյանը սա կոչել է «ջերմ ընտանեկան հարաբերություն» եւ խնդրել չմտնել մատի և մատանու արանքը: Աշխատողներին հարկադիր ստորագրությամբ անվճար պարապուրդի ուղարկելու մասին ահազանգեր եղան նաեւ «ՍԱՍ Գրուպ» ընկերության հետ կապված:
Կարդացեք նաև
Նելլի ԳՐԻԳՈՐՅԱՆ
