Կալանքի տակ գտնվող ԲՀԿ առաջնորդ Գագիկ Ծառուկյանին պատկանող Առինջ մոլում շարունակում է իրավիճակը լարված մնալ, իրավապահները կապարակնքել են տոնավաճառի 20-ից ավելի տաղավարներ։ Ընդ որում, աշխատակիցների հավաստմամբ` այս գործողությունն արվել է տոնավաճառի իրենց համար ոչ աշխատանքային օրվա ընթացքում և առանց իրենց տեղյակ պահելու։ Առինջ մոլի աշխատակիցները չեն կարողանում անել իրենց ամենօրյա առևտուրը։
Աշխատակիցներից մեկը լրագրողներին փոխանցեց, որ իրենց ասել են, թե իբր բարձրավոլտ հոսանքալարերի տակ է գտնվում տարածքը, և սա այն դեպքում, երբ հենց նույն պահին հարևանությամբ շինարարություն է ընթանում։ Առինջ մոլի աշխատակիցները համոզված են, որ այս ամենը քաղաքական հաշվեհարդարի հետևանք է։ Նրանք պնդում են, որ 6 տարի աշխատելով Առինջ մոլում և հարկեր վճարելով՝ երբևէ չեն տեսել, որ նույն հոսանքալարի հետ կապված պատճառաբանությամբ խափանվի իրենց աշխատանքը։
«Ասում եմ՝ անձնագիրս խանութում է, կարելի՞ է վերցնեմ, ինձ վաղը պետք է, ասում են՝ դիմում գրի, դիմումիդ ընթացք կտանք: Հիմա էդ քրեական վարույթը կարող է 3 ամիս կամ մի տարի տեւել»,-նեղսրտեց աշխատակիցներից մեկը:
Կարդացեք նաև
Առինջ մոլում աշխատող մարդիկ լրագրողների հետ զրույցում նաև նշեցին, որ ի նշան բողոքի պատրաստ են դիմել կտրուկ միջոցների՝ ընդհուպ փակել ավտոճանապարհը։ Այս պահին ոստիկանները բանակցություններ են տանում նրանց հետ։
-Ճամփա փակելը մոռացեք,- ասաց ոստիկանության աշխատակիցը «Առինջ մոլի» առեւտրականներին:
-Դուրս ենք գալու,- ասաց մի կին:
-Դուրս չեք գալու։
-Դա՞ է Հայաստանի Հանրապետության քաղաքացու կողքին կանգնելը, մեզ ո՞վ պիտի օգնի, ո՞վ է մեզ ինչ-որ պատասխան տալու:
-Տիկին, ճամփա դուրս չեք գալու, այլ քաղաքացիների ազատ տեղաշարժը փակելու իրավունք չունեք:
-Իսկ դուք ինչո՞ւ եք փակել:
-Մենք կանգնած ենք ձեր անվտանգությունն ապահովելու համար,- ասաց ոստիկանության աշխատակիցը:
Անգամ այն տաղավարների տերերը, որոնց տաղավարները կապարակնքված չէին, պահանջում էին բացել իրենց գործընկերների տաղավարները, քանի որ համոզված են, որ վաղը նույնը կարող է իրենց հետ պատահել:
«Առինջ մոլի» աշխատակիցների ցույցն ամբողջությամբ
Գոհար ՀԱԿՈԲՅԱՆ
Լուսանկարը՝ Վահե Մակարյանի ֆեյսբուքյան էջից
