Ֆեյսբուքյան ուղիղ միացման ժամանակ ՀՀ վարչապետ Նիկոլ Փաշինյանը պատասխանեց ամենաշատ հավանումներ ստացած հարցերին: Մի օգտատեր հարց էր ուղղել՝ արդյոք վարչապետը չի՞ կարծում, որ «Իմ քայլը» խմբակցության անդամների մեծ մասն անիմաստ խոսող ու ոչինչ չանող դեմքեր են, որոնց գործունեությունից ընտրողների մեծ մասը վաղուց հասցրել է հիասթափվել, գուցե նրան մի մասին տուն ուղարկեն ու ավելի ինտելեկտուալ, գործունյա մարդիկ ներգրավեն թիմում:
Նիկոլ Փաշինյանն ասաց, որ հարցը կարդալիս հիշել է այն քննադատությունները, որ ուղղվում էին իրեն, երբ ինքը ԱԺ պատգամավոր էր:
«Խորհրդարան բառը, խորհրդարան երեւույթը ի հայտ է եկել պառլամենտ բառից, որը նշանակում է խոսելու տեղ: Սա շատ կարեւոր ինստիտուտ է ժողովրդավարության առումով, որովհետեւ պառլամենտը հենց այն տեղն է, որտեղ քաղաքական ուժերը պետք է մտքեր փոխանակեն, պետք է մտքերի բախում, բանավեճ տեղի ունենա: Այս առումով խոսելը, արտահայտվելը խորհրդարանում իրականացվող հիմնական գործն է»,-ասաց նա՝ նշելով, որ չպետք է թերագնահատել խոսքի արժեքը:
Ինչ վերաբերում է խորհրդարանական մեծամասնությանը, այս մասին էլ ասաց. «Այսօրվա խորհրդարանի եւ խորհրդարանական մեծամասնության լավագույն գնահատականը տրվել է հարեւան Ադրբեջանում, երբ մեր երկրում տեղի ունեցած արտահերթ խորհրդարանական ընտրություններից հետո Ադրբեջանում որոշում կայացվեց անցկացնել արտահերթ խորհրդարանական ընտրություններ՝ պատճառաբանությամբ, որ Ադրբեջանն ունի կարիք ավելի երիտասարդ, ժամանակակից պայմաններին համապատասխան խորհրդարան ձեւավորելու »: Վարչապետի խոսքերով՝ «Իմ քայլը» խմբակցությունը գործում է բավականին արդյունավետ:
Կարդացեք նաև
Նա հղում անելով վիճակագրությանը, ասաց, որ ԱԺ պատգամավորների օրենսդրական գործունեությունը երբեք ավելի արդյունավետ չի եղել: «Ես համարձակություն կունենամ ասելու, որ այս խորհրդարանը ազատ, արդար, թափանցիկ ընտրություններով ձեւավորված խորհրդարան է, որն իր որակով գերազանցում է նախորդ մի քանի խորհրդարաններին: Բնականաբար խորհրդարանական մեծամասնությունն է ձեւավորում խորհրդարանի իմիջը: Ինչ վերաբերում է «Իմ քայլը» խմբակցությանը, նրա խնդիրն է՝ կայանալ որպես ամբողջական գաղափարական հենքի վրա աշխատող քաղաքական թիմ: Այս առումով կա լուրջ անելիք, որը կիրականացնենք լիարժեք: Իսկ մինչեւ այս պահը այդ խնդիրը լուծված է բավականին արդյունավետ կերպով»:
Նիկոլ Փաշինյանն օրինակ բերեց՝ Սահմանադրական հանրաքվեի քննարկումը՝ ասելով. «Այդ ժամանակ ես հպարտություն ապրեցի»:
Նրա խոսքերով, նույնը վերաբերում է արտակարգ իրավիճակի եւ այլ հարցերի վերաբերյալ քննարկումներին:
Գոհար ՀԱԿՈԲՅԱՆ
Թող հպարտութիւն ապրի, թող շարունակի պատրանքներով ապրել, չտեսնել իրականութիւնը: Իր խնդիրն է: Մեր պատասխանն էլ պարզից պարզ է. յաջորդ ընտրութիւններին ձեզ ձայն չեն(ք) տալու: