Գազի գնի վերաբերյալ ՌԴ նախագահ Վլադիմիր Պուտինի հայտարարությունները նախևառաջ քաղաքականություն է և քիչ առնչություն ունի տնտեսական, կոմերցիոն հարաբերությունների հետ: Այս մասին The Insider ռուսական պարբերականում գրել է «RusEnergy» խորհրդատվական ընկերության վերլուծաբան Միխայիլ Կրուտիխինը:
Պարբերականը հիշեցնում է, որ ՌԴ նախագահ Վլադիմիր Պուտինը մայիսի 19-ին Եվրասիական տնտեսական բարձրագույն խորհրդի՝ տեսակոնֆերանսի ռեժիմով անցկացված նիստի ժամանակ մերժել է Հայաստանի և Բելառուսի՝ գազի տարանցման միասնական սակագին ներդնելու առաջարկը: Պուտինի խոսքով՝ միասնական սակագին հնարավոր է կիրառել միայն միասնական շուկայում:
«Հայաստանի դեպքում իրավիճակը բարդ է, քանի որ գազը պատկանում է «Գազպրոմ»-ին: Այսինքն «Գազպրոմ»-ը իր գնով է գազը մատակարարում մինչև Հայաստանի հետ սահման, այնուհետև վաճառում է իր սեփական ստորաբաժանմանը համեմատաբար ոչ բարձր գնով, որը վերցրել են օդից: Այնուհետև ընկերության ստորաբաժանումը գազը վաճառում է Հայաստանի ներսում իր իսկ սահմանած գնով: Սա շուկայի հետ որևէ առնչություն չուն: Ներգազպրոմյան առևտուր է:
Բելառուսի դեպքում իրավիճակն այլ է, բայց այս դեպքում ևս խնդիրը կոմերցիոն չէ, այլ քաղաքական: Միտքը նույնն է, և՛ Հայաստանին, և՛ Բելառուսին Ռուսաստանի ղեկավարությունն այժմ ասում է. «Պատրաստ ենք գազի գնի զեղչ տրամադրել, եթե ընդունեք այսպես կոչված «Եվրասիական միություն» ինտեգրման պայմանները»: Ընդունեք քաղաքական պայմաններ, գազ ստացեք այլ գնով: Թե ինչ գին կսահմանվի, նորից կվերցնեն օդից, քանի որ էկոնոմիկայի հետ սա որևէ առնչություն չունի: Գները մեկնաբանել հնարավոր չէ, դրանք սահմանվել են կամայական և կամայական էլ կարող են փոխվել քաղաքական գործիչների ցանկության դեպքում:
Կարդացեք նաև
Հայաստանը ընտրություն չունի… դժվար է պատկերացնել, որ «Գազպրոմի» ստորաբաժանումը գազ կգնի ոչ թե «Գազպրոմից», այլ ուրիշ ընկերությունից՝ Իրանի կամ Թուրքիայի տարածքով: Դա հնարավոր չէ:
Ինչ վերաբերում է Բելառուսին, ապա նրանք կարող են գազ ստանալ օրինակ Լեհաստանից, բայց սա ևս կլինի քաղաքական որոշում, այլ ոչ թե տնտեսական… Այն, ինչ տեղի է ունենում այժմ, քաղաքականություն է, երկու երկրների ձեռքերի ոլորում»,- կարծում է Միխայիլ Կրուտիխինը:
Պատրաստեց՝ Վիկտորյա ԱՆԴՐԵԱՍՅԱՆԸ
