Քանի դեռ ծնեբեկի սեզոնն է, հնարավորինս հաճախ է պետք ուտել այդ հրաշալի բանջարեղենը: Այս անգամ առաջարկում եմ հետաքրքիր մի ուտեստ՝ ֆիլո խմորով փաթաթված ծնեբեկ, որը կարող եք ե՛ւ որպես նախաճաշ պատրաստել, եւ երեկոյան՝ մի բաժակ գինու հետ շատ լավ կհամադրվի:
Անհրաժեշտ մթերքները
Ֆիլո խմոր- 1 տուփ (500 գրամանոց, որի մեջ 15-16 հատ խմորի թերթիկ կա)
Ծնեբեկ- 30-32 հատ
Կարդացեք նաև
Բուսական յուղ- մոտ 100 գրամ (ցանկալի է վերցնել ձիթապտղի յուղ)
Խոզի ապխտած կրծքամիս կամ բեկոն- 5-6 կտոր
Որեւէ փափուկ, հալվող պանիր՝ սուլուգունի, մոցարելա-5-6 կտոր
Դեղին, չոր պանիր- գաուդա կամ չեդդեր տեսակի- 5-6 կտոր
Պարմեզան- 50 գրամ
Աղացած կարմիր կծու պղպեղ- 0,5 թեյի գդալ
Արեւածաղկի մաքրած սերմեր կամ քունջութ-1 թեյի գդալ
Պատրաստման եղանակը
Ինչպես հայտնի է, ֆիլո խմորը վաճառվում է սառեցված վիճակում, եւ գնելուց հետո էլ պետք է պահպանել սառցարանում: Ցանկացած թխվածք ֆիլո խմորով պատրաստելու համար խմորը պետք է սառցախցիկից հանել առնվազն 5-6 ժամ առաջ եւ դնել սառնարան: Սառնարանում այն ավելի երկար է ապասառեցվում, բայց ավելի լավ վիճակում է լինում, քան եթե միանգամից սենյակային ջերմաստիճանում ապասառեցնեք:
Եվ ուրեմն, ապասառեցրեք ֆիլո խմորը:
Ծնեբեկի ստորին մասի կոպիտ հատվածը հեռացրեք, մաքրեք նաեւ թեփուկները, լավ լվացեք: Պարմեզանը քերեք մանր քերիչով, իսկ մյուս երկու տեսակի պանիրները շատ բարակ շերտով կտրատեք:
Վերցրեք մեկ թերթիկ խմոր, վրան ցողեք ձիթայուղ, վրձինով տարածեք, ծալեք մեջտեղից, նորից վրան ձիթայուղ քսեք: 
Այժմ պետք է «լցոնել» ֆիլոյի թերթիկը: Կարող եք ցանկացած համադրություն կազմել: Օրինակ՝ միայն բեկոնով (խոզապուխտով) եւ ծնեբեկով: Դրա համար ֆիլոյի մի եզրին դրեք բեկոնը, վրան՝ իրարից բավականին հեռու, դրեք երկու հատ ծնեբեկ: Մեկ այլ համադրություն կարող է լինել բեկոնը, պանիրը եւ ծնեբեկը: Կամ՝ միայն պանիր ու ծնեբեկ: Կամ՝ երկու տեսակի պանիր եւ ծնեբեկ: Եթե բուսակեր եք եւ պանիր էլ չեք սիրում, կարող եք ծնեբեկի հետ մայոնեզ կամ կետչուպ դնել, կամ՝ «մարինարա» թանձրուկ, կամ՝ երկու-երեք մասի բաժանած չերրի լոլիկ:
Ապա գլանաձեւ փաթաթեք խմորը:
Այդպես բոլոր թերթիկները ձեր նախընտրությամբ լցոնեք եւ փաթաթեք:
Ջեռոցը միացրեք 220 աստիճան, թողեք տաքանա, մինչեւ վերջնական տեսքի բերեք գլանակ-կարկանդակները: Ջեռոցի տապակի վրա յուղաթուղթ դրեք, գլանակները շարեք վրան, վրայից էլ ձիթայուղ քսեք, ապա մանր քերած պարմեզան, աղացած կարմիր պղպեղ եւ արեւածաղկի սերմեր կամ քունջութ ցանեք յուրաքանչյուր գլանակի վրա: Կարող եք յուրաքանչյուր տեսակի լցոնով գլանակի վրա որեւէ կոնկրետ բան ցանել, որպեսզի հետո հստակ իմանաք, թե որ գլանակն ինչ լցոնով է:
Դրեք ջեռոցը մոտ 15-20 րոպեով, մինչեւ լավ կարմրի: Մատուցեք տաք-տաք: Սառը վիճակում նույնպես շատ համեղ է:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
