Կառավարությունները և պաշտոնյաները, հավատարիմ մնալով հակակոռուպցիոն միջոցառումներին, իրենց գործելաոճով պետք է օրինակ ծառայեն և լինեն թափանցիկ: Այս մասին ասվում է Եվրոպայի խորհրդի Կոռուպցիայի դեմ պայքարող պետությունների խմբի (ԳՐԵԿՈ) ամենամյա զեկույցում:
Զեկույցում ներկայացված է, թե ինչպես են ԳՐԵԿՈ-ի անդամ պետությունները, այդ թվում՝ Հայաստանը, իրականացրել խորհրդարանականների, դատավորների ու դատախազների շրջանում կոռուպցիան կանխարգելելու վերաբերյալ արված հանձնարարականները 2019թ.:
Զեկույցի համաձայն՝ 2019թ. դեկտեմբերի 31-ի դրությամբ Հայաստանը դասվել է այն երկրների շարքին, որոնք մասամբ են իրականացրել կամ չեն իրականացրել ԳՐԵԿՈ-ի հանձնարարականները: Մասնավորապես, Հայաստանը 24 հանձնարարականից կատարել է 9-ը (37.5%), իսկ 15 հանձնարարական իրականացրել է մասամբ (62.5%): 2019թ. դեկտեմբերի 31-ի դրությամբ՝ Հայաստանը դասվել է այն երկրների շարքին, որոնց համար ԳՐԵԿՈ-ն պատրաստել էր մեծ թվով հանձնարարականներ:
Ցուցակը գլխավորում է Թուրքիան (37), որին հաջորդում է Հունաստանը (25), Մակեդոնիան (25), Հայաստանը (24), Բոսնիա և Հերցոգովինան (23), Լեհաստանը (22), Ադրբեջանը (21), Սլովենիան (21), Ավստրիան (20), Բելգիան (19), Բուլղարիան (19) և Էստոնիան:
Կարդացեք նաև
Բացի այդ նշվում է, որ Հայաստանը դասվել է այն երկրների շարքին, որոնք ամբողջությամբ չեն իրականացրել խորհրդարանականների շրջանում կոռուպցիայի կանխարգելման ուղղված հանձնարարականները, մասնավորապես, չի կատարվել դրանց 86%-ը: Ինչ վերաբերում է դատավորների և դատախազների շրջանում կոռուպցիայի կանխարգելման ուղղված հանձնարարականներին, ապա դրանք կատարվել են համապատասխանաբար 40 և 57.1 տոկոսներով:
ԵԽ գլխավոր քարտուղար Մարիա Պեյչինովիչ Բուրիչն իր հերթին շեշտել է, որ Կոռուպցիան խաթարում է քաղաքացիների վստահությունը ժողովրդավարության և ժողովրդավարական ինստիտուտների նկատմամբ, ուստի հակակոռուպցիոն արդյունավետ միջոցառումների իրականացումը, միասնականության, թափանցիկության խթանումը պետք է առաջնահերթ լինի իշխանությունների համար բոլոր ժամանակներում: Նրա խոսքով՝ պետությունները որոշակի առաջընթաց գրանցել են, բայց չպետք է շարունակեն ջանալ՝ ԳՐԵԿՈ-ի հանձնարարականներն ամբողջությամբ իրականացնելու համար:
Պատրաստեց՝ Վիկտորյա ԱՆԴՐԵԱՍՅԱՆԸ
