«Սասնա ծռեր» խմբավորման կողմից ՊՊԾ գնդի գրավման գործով, դատավոր Մեսրոպ Մակյանի նախագահությամբ այսօր շարունակվող նիստում դատավորը ամբաստանյալ Պավլիկ Մանուկյանին նկատողություն հայտարարեց եւ տասը ժամով հեռացրեց դատական նիստերի դահլիճից`դիմակը պատշաճ չկելու համար:
Հիշեցնենք, նախորդ նիստում, դատարանի այգում դիմակ չկրելու համար Պավլիկ Մանուկյանին բերման էին ենթարկել:
Դատական նիստն այսօր սկսվեց 20 րոպեից ավելի ուշացումով: Պատճառը`կրկին պաշտպան Տիգրան Եգորյանի ուշանալն էր: Դատարանը բավարար եւ հիմնավոր չհամարեց պաշտպանի պատճառաբանությունները, քանի որ ուշացումները պարբերական բնույթի են: Տիգրան Եգորյանի պահվածքը դատավորը բնորոշեց անհարգալից վերաբերմունք դատարանի նկատմամբ: Դատավորը նկատողություն հայտարարեց Տիգրան Եգորյանին եւ հորդորեց իր աշխատանքային գործունեությունն այլեւս այնպես կազմակերպել, որ նման բաներ հաջորդիվ չկրկնվեն եւ 15-20 մարդ իրեն չսպասեն:
Դատարանն այսօր պետք է սկսի Տիգրան Եգորյանի միջնորդությամբ դատարան ներկայացած անձանց հարցաքննությունը: Եթե հաջորդիվ պաշտպանի ուշացումները կրկնվեն, իր միջնորդությամբ հարցաքննության ներկայացած անձանց հարցաքննությունը կհետաձգվի:
Կարդացեք նաև
Տիգրան Եգորյանը դատարանի որոշումը օբյեկտիվ չի համարում:
Այսօր դատարան էին ներկայացել «Սասնա ծռերի» մայր գործից անջատված մասով ամբաստանյալներ Տիգրան Մանուկյանը եւ Արթուր Մելքոնյանը, Գառնիկ Հովակիմյանը հանկարծակի էր եկել իրեն դատարան հրավիրելու փաստից, ասել էր`կմտածի, բայց այսօր դատարան չէր եկել: Իսկ մեկ անձի հետ ընդհանրապես հնարավոր չի եղել կապ հաստատել:
Դատավորը ուշագրավ համարեց այն, որ հարցաքննության վկայակոչված անձանց մասին միջնորդություն ներկայացնելուց հետո Տիգրան Եգորյանը մեկ շաբաթ շարունակ դատարանի հետ կապի դուրս չի եկել: Այդ պատճառով, դատարանը չի կարողացել պաշտպանին ներգրավվել Գառնիկ Հովակիմյանին հարցաքննության կանչելու գործում: Դատավորը չի հասկանում Եգորյանի պահվածքը`երբ իրեն պետք է դատարանի հետ կապի է դուրս գալիս, երբ դատարանին է պետք, նրան գտնել չեն կարողանում:
Նելլի ԳՐԻԳՈՐՅԱՆ
