Երեւանի ընդհանուր իրավասության դատարանի նստավայրում ԲՀԿ առաջնորդ Գագիկ Ծառուկյանին կալանավորելու վերաբերյալ դատական քննությունը, ըստ նախնական տվյալների, նշանակված է ժամը 19:00-ին, սակայն, ըստ ամենայնի, Ծառուկյանը դեռ չի ժամանել դատարան: Իսկ ոստիկանությունը Կոմիտասի անվան զբոսայգու՝ դատարանի մասնաշենքին հարող տարածքում եւ Արշակունյաց փողոցում ուժեղացված հսկողություն է սահմանել, դատարանի մերձակա տարածք մուտք գործել թույլատրվում է միայն լրագրողներին եւ պատգամավորներին, այլոց մուտքն արգելված է:
Aravot.am-ը զրուցեց Աժ պատգամավորներ, ԲՀԿ խմբակցության անդամներ Արտյոմ Ծառուկյանի եւ Նորա Առուստամյանի հետ:
Մեր հարցին, թե ի՞նչ ակնկալիք ունեն այսօրվա դատական նիստից, Արտյոմ Ծառուկյանը պատասխանեց. «Դատելով այն ամենից, ինչը բիրտ եղանակով կիրառվում է ԲՀԿ նկատմամբ, իմ ինտուիցիան ոչ մի լավ բան չի հուշում: Ես խոսում եմ անձամբ իմ անունից, բայց եթե հավատանք մեր ներքին ձայնին, ամեն ինչ շատ արագ եւ շատ կարճ ժամկետներում է լավ լինելու: Դուք պատկերացնում եք, չէ՞, թե գործի ինչ ծավալ է, եւ չի բացառվում, որ այսօրվա նիստում որոշում չկայացվի»:
Կարդացեք նաև
Նորա Առուստամյանն ավելի հակիրճ գտնվեց. «Եկեք կանխագուշակություններով չզբաղվենք, ես կարող եմ միայն իմ ցանկությունը հայտնել, որ մեր առաջնորդը շուտ վերադառնա եւ մենք շարունակենք իրար հետ աշխատել»:
Աշոտ ՀԱԿՈԲՅԱՆ
