Ինչպես հայտնի է, Ռուսաստանի, Հայաստանի եւ Ադրբեջանի ԱԳ նախարարների՝ հոկտեմբերի 9-ի հանդիպման արդյունքներով ձեռք բերվեց 12:00-ից հումանիտար հրադադարի եւ առարկայական բանակցություններ սկսելու պայմանավորվածություն, սակայն այսօր նախանշված ժամից հետո էլ Ադրբեջանը շարունակում է հարվածներ հասցնել: Aravot.am-ն Արցախի նախագահի մամուլի խոսնակ Վահրամ Պողոսյանից հետաքրքրվեց՝ որքանո՞վ կարող ենք եզրակացնել, որ հրադադարը հակառակորդն օգտագործելու է վերախմբավորման եւ նոր հարձակումներ պլանավորելու համար:
«Այս պահին շատ դժվար է որեւէ կանխատեսումներ անել, որովհետեւ մենք այնպիսի հակառակորդ, այնպիսի թշնամի ունենք, որը պարզապես ոչ մի պայմանավորվածություն չի կարողանում հարգել: Այսօր միանշանակ կարող ենք արձանագրել, որ հրադադար, որպես այդպիսին, չկա, քանի որ հակառակորդը շփման գծի տարբեր ուղղություններով շարունակում է ինտենսիվ կրակ վարել, այդ թվում՝ հարձակողական գործողություններ իրականացնել: Պաշտպանության բանակն այս պահին իրականացնում է կանխարգելիչ միջոցառումներ՝ հակառակորդի հարձակումները ձախողելու եւ տարբեր տեսակի կորուստներ հասցնելու համար»,-մեզ հետ զրույցում ասաց Վահրամ Պողոսյանը:
Լուիզա ՍՈՒՔԻԱՍՅԱՆ