Հայ-ադրբեջանական վերջին պատերազմում Լեռնային Ղարաբաղի տնտեսությանը հասցված վնասը հավասար է վերջին մի քանի տարիներին նրա ՀՆԱ-ի ծավալին: Այս մասին «ՌԻԱ Նովոստիի» հետ զրույցում հայտարարել է Արցախի պետնախարար Գրիգորի Մարտիրոսյանը:
«Հակառակորդի պատճառած վնասը պարզապես հսկայական է: Այժմ աշխատանքներ են տարվում դրամական արտահայտմամբ դրան գնահատական տալու ուղղությամբ, բայց կարելի է ասել, որ այն հավասար է վերջին մի քանի տարիներին հանրապետության ՀՆԱ-ի ծավալին: Դա առաջին հերթին վերաբերում է այնպիսի ոլորտների, ինչպիսիք են գյուղատնտեսությունը, էներգետիկան»,- ասել է Մարտիրոսյանը:
Նրա խոսքով՝ վերջին պատերազմի հետևանքով երկրի բնակչությունը հայտնվել է «մարդասիրական ճգնաժամի եզրին»: Ռազմական գործողությունների հասցրած վնասն առավելապես դիպչել է ենթակառուցվածքներին և քաղաքացիների մասնավոր սեփականությանը:
«Քանի որ ռազմական գործողությունների հետևանքով տարածքների մեծ մասն անցել է հակառակորդին կամ գրավվել, մեր տնտեսությունը զրկվել է գյուղատնտեսական հողերի և էներգետիկայի օբյեկտների մեծ մասից: Գումարած՝ քաղաքացիների սեփականության մեծ մասը՝ անշարժ գույքի օբյեկտներ, մասնավոր և գյուղատնտեսական տեխնիկա ոչնչացվել է կամ մնացել մեր վերահսկողությունից դուրս»,- ասել է Մարտիրոսյանը:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
