Այսօր ԱԺ-ում ԿԳՄՍ նախարար Վահրամ Դումանյանը ներկայացրեց «Բարձրագույն կրթության եւ գիտության մասին» օրենքի նախագիծը, որն առաջարկում է բուհերի կառավարման խորհուրդները ձեւավորել 9 հոգանոց կազմով, որից 5-ը կլինեն կառավարության եւ լիազոր մարմնի կողմից, 4-ը՝ դասախոսներ կամ ուսանողներ: Գործող օրենքի համեմատ այդ թիվը նվազեցվում է:
«Լուսավոր Հայաստան» խմբակցության պատգամավոր Անի Սամսոնյանը հարցրեց, թե ինչո՞ւ հենց 9, ինչո՞վ են եկել համոզման, որ կառավարության 5 ներկայացուցիչները կարող են ապահովել բուհի ինքնավար, անկաշկանդ կառավարումը: Նախարարը պատասխանեց, որ 4 ներկայացուցիչ բուհն է ընտրելու՝ կլինեն ուսանող, թե դասախոս, համամասնությունը չեն ամրագրել: Ինչ վերաբերում է խորհրդի անդամների թվին՝ Դումանյանն ասաց, որ շատ բարդ է դա անառարկելիորեն հիմնավորել, ինչպես որ բարդ է գիտականորեն հիմնավորել, թե ինչու պետք է պատգամավորների թիվը լինի այսքան: Նախարարը հավելեց, որ բուհերի թիվն էլ է մեծ մեր փոքրիկ հանրապետության համեմատ:
Թե ինչպես են բուհի կառավարման խորհրդի անդամների հարաբերակցությունը այդպես որոշել՝ 5/4, նախարարը պատասխանեց, որ իր անձնական կարծիքով պետք է լինի 9/0. «Եթե բուհի հիմնադիրը պետությունն է, պետությունը պետք է կրի 100 տոկոս պատասխանատվություն բուհի գործունեության համար: Պատասխանատվությունը միայնակ չի լինում, իրավունքների հետ է լինում: Այսօր այդ որոշումը բացարձակ ընկալելի չէր լինի մեր հանրության, ուսանողության ու դասախոսության կողմից»:
Անի Սամսոնյանը հիշեցրեց, որ ՀՀ Սահմանադրությամբ բուհերին տրված է իրավունք ունենալ ինքնավարություն ու այս հաշվարկով՝ 9 հոգանոց կառավարման խորհրդով, ակադեմիական եւ ուսանողական շրջանակին տրված է շատ սահմանափակ տեղ, վտանգված է ինքնավարության իրավունքը: Նախարարը պատասխանեց, որ բացարձակ ճշմարտություն չէ դա, մոտեցումները տարբեր են. «Ինքնավարություն: Շփոթվում է դա այլ բանի հետ: Բուհի ինքնավարությունը սկսվում եւ ավարտվում է բուհի առաքելությունն իրականացնելու գործունեության մեջ: Բուհը ինքնավար է իր կանոնադրական նպատակները եւ խնդիրները իրականացնելու գործում: Ինչ վերաբերում է կառավարիչ նշանակելուն, կառավարիչը ընդամենը պետք է բուհի անձնակազմի համար ստեղծի կոմֆորտային պայմաններ»:
Կարդացեք նաև
Հռիփսիմե ՋԵԲԵՋՅԱՆ
