Aravot.am-ը Արցախի Հանրապետության կրթության գիտության մշակույթի եւ սպորտի նախարար Լուսինե Ղարախանյանից հետաքրքրվեց, թե որպես ոլորտային գերատեսչության ղեկավար՝ ի՞նչ կարծիքի է «Լեզվի մասին օրենքում փոփոխություններ եւ լրացումներ կատարելու մասին» ԱՀ օրենքի՝ աղմուկ հանած նախագծի վերաբերյալ, ըստ որի՝ նախատեսվում է գրական հայերենից բացի՝ ռուսերենը եւս դարձնել Արցախի Հանրապետության պաշտոնական լեզու։
«Ոչ թե երկրորդ պետական լեզվի, այլ երկրորդ պաշտոնական լեզվի մասին է խոսքը, եւ ինչպես գիտեք, հայերենը որպես պետական լեզու ամրագրված է Արցախի Հանրապետության Սահմանադրությամբ: Այդ նախագծով պարզապես պաշտոնական հայերենին ավելացվում է նաեւ ռուսերենը, ինչը էական նշանակություն չի կարող ունենալ Արցախի լեզվական քաղաքականության համատեքստում»,-նշեց Արցախի ԿԳՄՍ նախարարը:
«Արցախը հայկական է, արցախցին խոսել եւ խոսելու է հայերեն, քանի որ յուրաքանչյուր արցախցի քաջ գիտակցում է, որ հայոց լեզուն սոսկ հաղորդակցության միջոց չէ, որ որպես գլխավոր կռվան՝ այն խորհրդանշում է մեր ազգային ինքնությունն ու արժանապատվությունը, անձնավորում է մեր ցեղի լուսեղեն ոգին, մեր հերոս նահատակների աննկուն կամքը: Լեզուն մենք ենք, յուրաքանչյուրս:
Միաժամանակ համոզված ենք, որ «Լեզվի մասին» օրենքում փոփոխությունների կարիք ներկայումս չկար, որքան էլ նախաձեռնողները դա պայմանավորեն օրվա հրամայականով: Այնուամենայնիվ, Արցախի ԿԳՄՍ նախարարությունը ինչպես նախկինում, այնպես էլ հետագայում ջանքեր չի խնայելու մեր ոսկեղենիկ մայրենին անաղարտ պահելու համար, քանզի լեզվի աղճատումը հանգեցնում է արժեհամակարգի եւ ինքնության աղճատմանը, եւ այս կենսական հարցում չենք կարող անտարբեր լինել:
Կարդացեք նաև
Թերեւս դա կարելի էր նաեւ մի քիչ ուշ նախաձեռնել, բայց չեմ կարծում, որ վնասելու է, քանի որ կրթական համակարգ չի մտնելու, նախագծի փոփոխությունը չի ազդելու Արցախի կրթական համակարգի վրա»,-ընդգծեց Լուսինե Ղարախանյանը:
Գոհար ՀԱԿՈԲՅԱՆ
Լուսանկարը` ԱՀ ԿԳՄՍ նախարարության ֆեյսբուքյան էջից:
