Այսօր կառավարությունը որոշեց Աբովյան-Պուշկին խաչմերուկից մինչեւ Սախարովի հրապարակ ընկած հատվածը հանել հանրային գերակա շահ ճանաչված գոտուց: Այդ նպատակով փոփոխություն կատարվեց «Երեւան քաղաքի վարչական սահմաններում գտնվող որոշ տարածքների նկատմամբ բացառիկ` գերակա հանրային շահ ճանաչելու մասին» որոշման նախագիծը:
Նիստը վարող փոխվարչապետի պաշտոնակատար Տիգրան Ավինյանը նշեց, որ մի քանի շենքեր ճանաչվել են մշակութային արժեք ներկայացնող, եւ այս քաղաքաշինական գործընթացում մեծ առաջընթաց չի եղել: Նրա խոսքով, հաշվի առնելով պահպանման հարցը՝ որոշում է կայացվել, որ դրանք դուրս գան հանրային գերակա շահի գոտուց. «Դրանց թվում հայտնի «Դոլմամա»-ի շենքն է, այն դուրս է գալիս հանրային գերակա շահ համարվող շենքերից ցուցակից»:
Կառավարության նիստում հարցը զեկուցում էր ՀՀ քաղաքաշինության կոմիտեի նախագահ Արմեն Ղուլարյանը, որի խոսքով՝ ՀՀ վարչապետի որոշմամբ գործում է աշխատանքային խումբ, որն ուսումնասիրում է մինչեւ 2018 թվականը հանրային շահ ճանաչված տարածքների օգտագործման իրականացման քաղաքաշինական գործընթացների վիճակը ու պարբերաբար այդ ուղղությամբ ներկայացրել են առաջարկություններ եւ սա հերթականներից մեկն էր:
Կարդացեք նաև
Լուսինե ԲՈՒԴԱՂՅԱՆ
