«Ես հիշում եմ Անդրանիկ Մարգարյանի անվան քաղաքական դպրոցում մի հանդիպում այնտեղ հավաքված երիտասարդների հետ, երբ դեռ պոպուլիզմը Հայաստանում չկար, եւ ես շատ հանգիստ փորձում էի մարդկանց բացատրել, որ պոպուլիզմը հատկապես կործանարար է այն երկրների համար, որոնք ունեն անվտանգության խնդիրներ, որոնք դեռևս չունեն շատ հստակ կայացած պետական կառույցներ: Ասածս ինչ է, որ մենք երբեք պոպուլիստ չենք եղել, եւ ես չեմ կարծում, որ մենք այսօր պետք է պոպուլիստական հայտարարություններ անենք, որովհետեւ Հայաստանի զարգացումը, ավելին ասեմ` ժողովրդավարությունը հակացուցված է էսօրվա իշխանություններին: Մեր պայքարը պետք է լինի, ոչ թե մարդկանց մեր կողմը գրավել, այլ մեր պայքարը պետք է լինի` ինչքան շուտ եւ ինչպես ենք կարողանում սրան հեռացնել»,- «Հանրապետականներ. շարունակական բարեփոխումներ» թեմայով համաժողովի «Հետպատերազմյան Հայաստան. Ի՞նչ քայլեր ձեռնարկել» պանելային քննարկման հարցուպատասխանի ժամանակ հայտարարել է ՀՀ պաշտոնաթող նախագահ Սերժ Սարգսյանը:
Սերժ Սարգսյանը նաեւ ասաց, որ տեւական ժամանակ ինքն ասում է՝ Հայաստանի ընդդիմությունը կարող է իշխանափոխություն կազմակերպել, եթե հիմնական ընդդիմադիր ուժերը իրենց առջեւ միայն մեկ նպատակ դնեն` իշխանափոխություն, այլ ոչ թե սրան իշխանությունից հեռացնել, ապա գալ իշխանության. «Այսօր իշխանության գալու մասին ընդհանրապես պետք չի մտածել, անկեղծ եմ ասում: Միգուցե սա ոգեւորիչ չի մեր հատկապես երիտասարդ կուսակցականների համար, բայց մեր երկրի շահը սրանից է բխում: Ես շատ ուրախ կլինեի, որ մեր ստացած տոկոսը երկու անգամ ավելի քիչ լիներ, բայց այլ ընդդիմադիրներ ավելի շատ տանեին, բայց մենք չունենայինք այսպիսի կառավարություն: Այ մեր մտածելակերպը այդպիսին պետք է լինի: Իսկ թե ինչպե՞ս դա անել՝ դրա համար էլ այսօր հավաքվել ենք այստեղ»:
Սերժ Սարգսյանը նաեւ ասաց, որ ՀՀԿ-ն առաջիկայում համագումար կանի, որի ժամանակ կթարմացվեն թե կուսակցության ղեկավար կազմը, թե շարքերը:
«Ավելի լավ է` մենք լինենք 1000 հոգի, բայց հասկանանք, որ 1000 մարտական մարդ կա, յուրաքանչյուրը պետք է հասկանա, որ իր հետեւում 999 մարտականորեն տրամադրված մարդ կա, քան լինենք 20 հազար եւ 200-300 հոգի այդպես մտածեն: Սա է հաղթանակի հասնելու ճանապարհը եւ ոչ թե առավոտից իրիկուն ժողովրդին ինչ-որ բաներ բացատրելը: Սկզբից մենք ինքներս մեզ պիտի բացատրենք, մենք պիտի համոզված լինենք, մենք պիտի պատրաստ լինենք, այլ դրանից հետո արդեն մտածենք մեր շարքերը դարձնենք 100-ավոր հազարներ»,-ասաց նա:
Կարդացեք նաև
Նելլի ԳՐԻԳՈՐՅԱՆ
