Լրագրողների հարցին, թե որքանո՞վ են հավաստի Գեղարքունիքի մարզպետի պնդումները, թե ադրբեջանցիները մխրճված տարածքներում ամրաշինական աշխատանքներ չեն կատարում եւ որ մեր զինվորների 80 տոկոսը վրանների տակ չէ, տնակներում է, իսկ մնացած 20 տոկոսի հարցն էլ մինչեւ ձմեռ ամեն դեպքում կլուծվի, ՀՀ ԱԺ «Պատիվ ունեմ» խմբակցության պատգամավոր, Պաշտպանության եւ անվտանգության հանձնաժողովի անդամ Տիգրան Աբրահամյանը պատասխանեց կարճ ու հստակ.
«Իսկ ո՞վ է Գեղարքունիքի մարզպետը, որ զինված ուժերի ամրաշինական աշխատանքների հետ կապված կարող է տեղեկություն հաղորդել, որն ինձ բավարարի, կամ դրա հիման վրա կառուցեմ իմ խոսքը կամ հետագա գնահատականները: Նախ, դրա հասցեատերը Պաշտպանության նախարարությունն է, ԶՈՒ գլխավոր շտաբը, քաղաքական ղեկավարությունը, որը իրավիճակի հետ կապված կարող է իրական գնահատական ներկայացնել: Երկրորդ. Այն հատվածները, որտեղ Ադրբեջանը մխրճվել է, միայն Գեղարքունիքի մարզով չի սահմանափակվում: Նաեւ Սյունիքի մարզում հատվածներ կան, նաեւ Վայոց Ձորի հատվածում: Եվ այն գնահատականները, այն մոտեցումները, որոնց ես եմ տիրապետում, շատ հեռու են այդ գնահատականներից, որոնք տվել է մարզպետը:
Ես նույնիսկ պաշտոնական աղբյուրներից ստացվող տարբեր տեսանյութերում, որտեղ, բնական է, բավականին սահմանափակումներով են կադրերն արվում, երբ վերլուծության եմ ենթարկում, այնտեղ էլ մեծ թվով խնդիրներ կան: Տնակը, առհասարակ, կացարանը պաշտպանական համակարգի դետալներից մեկն է, օրինակ, 1/100 մասը: Եվ այն մարդիկ, ովքեր վրանների փոխարինումը տնակներով դիտարկում են որպես համակարգում անհրաժեշտ աշխատանքների իրականացում կամ ամբողջացում, նրանք կամ մոլորեցնում են մեր հասարակությանը, կամ ուղղակի չեն տիրապետում իրավիճակին»:
Աշոտ ՀԱԿՈԲՅԱՆ
