Այսօր ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի հանձնաժողովում ՔՊ պատգամավոր Արթուր Հովհաննիսյանը ներկայացրեց «Զանգվածային լրատվության մասին» օրենքում փոփոխությունների նախագիծը:
Նախագծով առաջարկվում է սահմանել, որ չնույնականացվող աղբյուրներին հղում անելու դեպքում՝ ԶԼՄ-ները չեն ազատվում պատասխանատվությունից: Ընդդիմադիր պատգամավորները մտահոգություն էին հայտնել, որ սրանով ցանկանում են սահմանափակել ԶԼՄ-ների՝ անանուն աղբյուրներից օգտվելու իրավունքը:
Արդարադատության նախարար Կարեն Անդրեասյանն ասաց, որ մտահոգությունը, որ կարող են սահմանափակվել անանուն աղբյուրներին հղում տալը, անտեղի է, քանի որ այն կարող է կարգավորել դաշտը. «Երկու հայտնի ֆեյք կա՝ «Անկախ Հայաստան» ու «Ռեգինա Պռազյան»: Պատկերացրեք, որեւէ մեկի մասին այս աղբյուրները տարածել են զրպարտող ինֆորմացիա, որը վարկաբեկում է մարդու, կապ չունի քաղաքական որ դաշտում ես: ԶԼՄ-ները վերցնում են այս լուրը ու ասում՝ սա ինձ ազատում է պատասխանատվությունից, որովհետեւ աղբյուր եմ օգտագործել: Հիմա դու պետք է հղում անես նորմալ աղբյուրների, մարդկանց, այդ դեպքում դու զրպարտության համար պատասխանատվություն չես կրում, բայց եթե դու օգտվել ես ֆեյքից՝ որեւէ մեկին զրպարտելու համար՝ չես ազատվելու պատասխանատվությունից: Այս նախագիծը սրա մասին է՝ ֆեյքին հղում տալով՝ դու պատասխանատվությունից չես ազատվելու: Մենք ուզում ենք ԶԼՄ-ները զրպարտեն ու որեւէ պատասխանատվություն չկրե՞ն, թե՞ լինեն պատասխանատու: Եթե չեն ուզում իրենց անանուն աղբյուրը բացահայտեն, իրենք պետք է շարունակեն կրել պատասխանատվությունը»:
Ըստ նրա, այս նախագծում ոչ մի ժողովրդավարության դեմ քայլ, ԶԼՄ-ների դեմ քայլ չկա: Ֆինանսական թափանցիկության մասին կարգավորումից խոսելով՝ Անդրեասյանն ասաց, որ սա օգնում է, որ ունենանք նորմալ լրատվական դաշտ. «Լավ լրագրողը նման բանից չպետք է վախենա, գիտի, որ այս տեսակ կարգավորումները բարձրացնելու են լրագրողական համայնքի ազդեցությունը ողջ հանրային դաշտի վրա»:
Կարդացեք նաև
Անդրեասյանն ասաց, որ շատ կարեւոր է «ֆոբիաները հաղթահարել». «ԶԼՄ-ների ձեռքերը լրիվ ազատություն չտալուց բացի՝ այստեղ որեւէ ուրիշ բան չկա: Օրենսդրությունը, որ գրվել է, հին է եղել՝ այն ժամանակ ֆեյքեր չեն եղել: Օրենսդրության գրվելու ժամանակ նոր աշխարհի երեւույթները չեն եղել: Հիմա կան ԶԼՄ-ներ, որոնք պատվիրատուի, մի ինչ-որ անանուն աղբյուր, զրպարտչական բան տարածել են, հետո հարգարժան ԶԼՄ-ներ սկսել են արտատպել: Սա քաղաքական դրոշներից անդին պաշտպանիչ գործոն է մեր համար: Բարեխիղճ ԶԼՄ-ն երբեք չէր վերցնի ֆեյքի գրածը տարածեր իր էջում: Համոզված եմ, բարեխիղճ ԶԼՄ-ն ինքն է կողմ լինելու այս կարգավորմանը»:
Սիսակ Գաբրիելյան
Հանձնաժողովի նախագահ Սիսակ Գաբրիելյանը հարցրեց՝ տելեգրամյան ալիքները որտե՞ղ կարող են տեխնիկապես զետեղել անուն, ազգանուն, հեռախոսահամար, հասցե եւ այլն, որ անանուն աղբյուր չդառնան՝ Արթուր Հովհաննիսյանը պատասխանեց, որ կա նման հնարավորություն: Կարեն Անդրեասյան էլ պարզաբանեց, որ հավական է որեւէ ալիքի պատասխանատվությունը մի հայտնի աղբյուր վերցնի իր վրա, ասի՝ ես եմ այս տելեգրամյան ալիքի տերը:
Հռիփսիմե ՋԵԲԵՋՅԱՆ
