Հայաստանի պետական կամերային նվագախմբի տնօրեն Ֆելիքս Բաբուրյանը Կամերային երաժշտության ազգային կենտրոնում կայացած ասուլիսում նշեց, որ հոկտեմբերի 26-ին եւ 28-ին երկու յուրահատուկ համերգ է կայանալու իտալացի հանրաճանաչ սաքսոֆոնահար Ֆեդերիկո Մոնդելչիի մասնակցությամբ, որը նաեւ հոկտեմբերի 26-ի համերգի դիրիժորն է:
Հավելեց, որ ծրագիրը միասին են կազմել իտալացի երաժշտի հետ, այնտեղ ներառված են Շառլ Ազնավուրի, Միքայել Թարիվերդիեւի, Նինո Ռոտայի ստեղծագործությունները, համերգին սպասվում են նաեւ անակնկալներ: Ինչ վերաբերում է հոկտեմբերի 28-ին իտալացի ակորդեոնահար Սիմոնե Զանկինի մասնակցությամբ համերգին, այն էլ նվիրված է Աստոր Պիացոլլայի ծննդյան 100-ամյակին:
Լրագրողի հարցին՝ ո՞րն է Հայաստանի հանդեպ իր սիրո պատճառը, բազմիցս Հայաստան այցելած Ֆեդերիկո Մոնդելչին այսպես պատասխանեց. «Այս երկրում որակի հետ կապված յուրահատկություն կա, հատկապես երաժշտության որակի առումով: Նույնիսկ այն կինոերաժշտության մեջ, որը Մանսուրյանը, Բաբաջանյանն են հեղինակել, դու միշտ զգում ես Հայաստանի շունչը: Օրինակ, Նինո Ռոտայի երաժշտությունը՝ Ֆելինիի ֆիլմերից հայտնի, գեղեցիկ երաժշտություն է, բայց եթե խոսում ենք հայկական երաժշտության մասին, այն լիովին ներծծված է հայկականությամբ…Հայկական երաժշտությունը միշտ կապ ունի հոգեւորի հետ, կարծես երկնային երաժշտություն լինի, նույնը Ազնավուրի դեպքում է»:
Կարդացեք նաև
Իտալացի սաքսոֆոնահարն ասաց, որ այս տարին հոբելյանական է Թարիվերդիեւի համար, դրանով է պայմանավորված առաջին համերգի ծրագիրը: «Թարիվերդիեւն ու Ազնավուրը կոմպոզիտորներ են, որոնք միայն դասական ժանրում չեն ստեղծագործել, երաժշտություն են գրել հեռուստատեսության, ֆիլմերերի համար… Այս երկու կոմպոզիտորների միջեւ ես ինչ-ինչ ընդհանրություններ եմ տեսնում»:
Մոնդելչին հավելեց, որ Թարիվերդիեւի եւ Կոմիտասի ստեղծագործությունների կատարմամբ մի անգամ հանդես է եկել Վերոնայում կայացած համերգում, Ազնավուր էլ պատրաստվում է հնչեցնել հաջորդ անգամ, մի անգամ էլ Սանկտ Պետերբուրգում է Ազնավուր հնչեցրել:
Իտալացի սաքսոֆոնահարը նշեց նաեւ, որ կարեւորը երաժշտության մեջ եւ կյանքում համբերատար ու մարդկանց հանդեպ բարեհամբույր լինելն է, շրջապատին լավագույնը տալը:
Գոհար ՀԱԿՈԲՅԱՆ
Լուսանկարները՝ Մոնդելչիի ֆեյսբուքյան էջից
