ԱԺ «Հայաստան» խմբակցությունը ՀՀ նախագահի պաշտոնից Արմեն Սարգսյանի հրաժարականից հետո նախագահի թեկնածու առաջադրելու առնչությամբ քննարկումների փուլում է։ «Մի քանի չափանիշներ նկատի ունենալով՝ առաջիկայում ավելի կոնկրետ կասենք»,-լրագրողների հետ ճեպազրույցում այսօր ասաց խմբակցության պատգամավոր Արծվիկ Մինասյանը։
Մեկնաբանելով Նիկոլ Փաշինյանի երեկվա հայտարարությունն այն մասին, որ նախագահը պետք է ներդաշնակ գործի կառավարության եւ ԱԺ-ի հետ՝ Մինասյանը կարծիք հայտնեց, որ Նիկոլ Փաշինյանի խոսքը վերաբերում էր իր իսկ իշխանությանը․ «Ակնհայտ է, որ այդ խոսքում չկա հիմնական միտքը եւ նպատակադրումը, որն առկա է եւ պետք է՝ ստեղծված վիճակից դուրս գալու համար։ Նախագահը չի կարող միայն քաղաքական մեծամասնության սրտի նախագահը լինել։ Նա պետք է ապահովի սահմանադրությամբ ամրագրվածի լիարժեք իրականացումը»։
«Հայաստան» դաշինքի պատգամավոր Աննա Գրիգորյանն էլ հետեւյալ դիրքորոշումը հայտնեց․ «Վտանգավոր էր Նիկոլ Փաշինյանի ձեւակերպումը, որ գործադիր եւ նախագահական ինստիտուտների միջեւ ներդաշնակեցում պետք է լինի։ Եթե հանրամատչելի ասենք, դա նշանակում է, որ Նիկոլ Փաշինյանը նախագահ է ուզում տեսնել մեկին, որը որեւէ առարկություն չի անի որեւէ հարցի հետ կապված, այսինքն՝ ոչ մի խոչընդոտ չի ստեղծի նոր խնդիրների դեպքում, կլինի լուռ եւ անհաղորդ»։
Լրագրողները հետաքրքրվեցին՝ նախագահի թեկնածուների ցանկում շրջանառում են Էդմոն Մարուքյանի, Արամ Զավենի Սարգսյանի անունները․ ընդդիմությունը դիրքորոշում ունի՞։ Արծվիկ Մինասյանը պատասխանեց․ «Մանրամասներն առաջիկայում կասենք, առաջարկում եմ այլ թեմաների անցնել»։
Կարդացեք նաև
Լուիզա ՍՈՒՔԻԱՍՅԱՆ
