ԱԺ ֆինանսավարկային եւ բյուջետային հարցերի հանձնաժողովը ՀՀ կենտրոնական բանկի խորհրդի անդամի պաշտոնի համար առաջադրել է ՔՊ-ի ներկայացրած՝ տնտեսագիտության դոցենտ, մանկավարժ, մասնավոր հատվածում ֆինանսական տնօրենի, հաշվապահի փորձառություն ունեցող, սեպտեմբերից մինչեւ այսօր ԱԺ նախագահի խորհրդական, Երեւանի ավագանու գործող անդամ (թվարկված պաշտոնները կասեցվելու են ընտրվելու դեպքում․-հեղ․) Լեւոն Սահակի Սահակյանի թեկնածությունը։
«Հայաստան» դաշինքի պատգամավոր Արմենուհի Կյուրեղյանը Սահակյանին ասաց, որ վերավարկավորող կազմակերպությունները քաղաքացիներին վարկեր են տրամադրում անգամ առցանց՝ միայն անձնագրի պատճենով, եւ չեն էլ հետաքրքրվում, թե մարդն ինչ վարկային պատմություն ունի։ Ըստ պատգամավորի՝ ստացվում է, որ նման վարկային կառույցները սպասարկում են խաղային գործունեությամբ զբաղվող կազմակերպություններին։
Լեւոն Սահակյանը նախ նշեց, որ առցանց վարկավորումը զարգանում է ողջ աշխարհում, եւ ՀՀ-ին զերծ պահել այդ տեխնոլոգիական առաջընթացից հնարավոր չէ․ «Սակայն այլ է հարցը, երբ նման տեխնոլոգիաները կարող են խարդախության ռիսկեր պարունակել։ Բնականաբար, ԿԲ-ն մինչեւ այս պահն իր վերահսկողական գործառույթներն իրականացնում է, որ սպառողների շահերը պաշտպանվեն։ Դրանից ամբողջապես հրաժարվելը հնարավոր չէ, բայց սպառողների շահերը միաժամանակ պետք է պաշտպանվեն։ Իսկ թե ինչ ուղղությամբ են հաջորդիվ ծախսվում նման վարկերը, ես կդժվարանամ ասել։ Բայց ամրագրել, թե առցանց վարկավորումը գնում է կոնկրետ ուղղության վրա, չենք կարող, չկա համապատասխան վիճակագրություն»։
Թեկնածուն շեշտեց, որ քաղաքացու պաշտպանության լավագույն գործիքը ֆինանսական գրագիտության բարձրացումն է։
Կարդացեք նաև
Լուիզա ՍՈՒՔԻԱՍՅԱՆ
