Հանրային ծառայությունները կարգավորող հանձնաժողովի նախագահ Գարեգին Բաղրամյանից այսօր լրագրողները խորհրդարանում հետաքրքրվեցին՝ հնարավո՞ր է գազի գինը ֆիքսել ռուբլիով։ Գարեգին Բաղրամյանը պատասխանեց․ «Այն մեթոդաբանությունը, որը քննարկվել է «Գազպրոմի» հետ եւ շուտով կընդունվի, նախատեսում է առաջիկա տասը տարվա համար որոշակի կայուն գնային քաղաքականություն, որպեսզի ֆիքսենք կորուստներն ու ծախսերը։ Որոշակի տարիներից հետո արդյունքային ցուցանիշներ պետք է ունենանք։ Այդ մեթոդաբանության շրջանակում դրական եւ բացասական գումարները, որոնք կառաջանան կորստի տատանումից, կփոխհատուցվեն։
«Գազպրոմը» համաձայն է սրա կիրառությանը, թեեւ մեթոդաբանությունը պաշտոնապես դեռ չի ընդունվել։ Եթե փոխարժեքը լինի ավելի կայուն, քան դոլարի տատանումը, ապա ազդեցությունը՝ դրական թե բացասական, սակագնի հաջորդ վերանայման դեպքում հաշվի է առնվելու»։
Բաղրամյանը շեշտեց, որ այս առնչությամբ պաշտոնական քննարկումներից այս պահին տեղյակ չէ։ «Որքան գազի ձեռքբերումը լինի կայուն փոխարժեքով, այնքան սակագնի հաջորդ վերանայման դեպքում ավելի քիչ գումար կփոխհատուցվի։ Պետք է գնահատել՝ ո՞ր փոխարժեքով է հարմար ձեռք բերել։ Պետք է քննարկել ու հասկանալ՝ ռուբլիին անցնելը մեր համար ձեռնտո՞ւ է, թե ոչ»,-հավելեց պաշտոնյան։
Լուիզա ՍՈՒՔԻԱՍՅԱՆ
