«Իսկ մե՞նք ինչ ենք անում։ Երբ 2020թ․-ի պատերազմը սկսվեց, ՀՀ-ում երկար քննարկվում էր՝ դիմե՞լ ՄԱԿ-ի անվտանգության խորհուրդ, թե՞ ոչ։ Էլ ինչի՞ համար են ստեղծվել ՄԱԿ-ն ու ԵԱՀԿ-ն։ Չեմ ասում, թե արդյունքը մեծ կլիներ, բայց որպես անկախ պետություն՝ պարտավոր էինք այդ լծակներն օգտագործել»,-«Միջազգային եւ անվտանգության հարցերի հայկական ինստիտուտի» հեղինակած՝ 2020թ․-ի նոյեմբերի 9-ի եռակողմ հայտարարության ստորագրումից հետո ՀՀ-ի եւ Արցախի դեմ Ադրբեջանի իրականացրած սադրանքների մասին զեկույցի ներկայացման ժամանակ այսօր հայտարարեց քաղաքագետ Ստեփան Գրիգորյանը։
«Օբյեկտիվ լինենք։ Շատ բաներ մենք չենք արել։ Պարտավոր եմ համեմատել։ Ուկրաինայի նախագահ Զելենսկին միայն զորքի՞ վրա հույս դրեց։ Նա ամեն օր մի ելույթ է ունենում տարբեր երկրների պառլամենտների համար, խոսում աշխարհի լիդերների հետ, օգտագործում քաղաքական-դիվանագիտական լծակները՝ իր տեսակետն առաջ տանելու համար։ Դրա համար էլ ՌԴ-ի հանդեպ պատժամիջոցներ կան։ Իսկ մենք դա արե՞լ ենք, որեւէ մեկին դիմե՞լ ենք։ Եթե խաղաղություն ենք ուզում, միջազգային ատյանները պետք է օգտագործել։ Դրան հասնելու համար միայն «այո» ասելով եւ Ադրբեջանի ամեն ասածին համաձայնելով չի լինում»,-հավելեց Ստեփան Գրիգորյանը։
Լուիզա ՍՈՒՔԻԱՍՅԱՆ
